金銀業貿易場新春開市，每年例牌搞個開市儀式，亦例牌請財經事務及庫務局局長嚟做嘉賓；因為上年12位局長洗咗牌，局長嘉賓今年再唔係馬仔馬時亨，而係陳家強。多咗個新鮮人（上年中上任，未做夠一年華華都當佢係新丁，即係新鮮人），成個儀式當堂有晒新鮮感；不過，最感新鮮嘅，應該係陳局長囉。
陳局長「初嚟埗到」，金銀業貿易場一班理事都唔敢怠慢，早有代表喺樓下迎接，入場前陳局長先披番件戰衣──出市代表件橙紅色單吊西，跟住出場向一班出市代表派利是，大家見到陳局長亦螞蟻摟蜜糖咁，爭住攞。陳局長派利是嘅經驗唔係冇，不過俾咁多人圍攻，睇怕都係第一次。
至於鼠年九九金開市，頭盤由金銀業貿易場理事長李德麟，同副理事長張德熙親自上場，好認真咁打手勢競價，陳局長企喺中間做見證，似乎睇得好過癮。而第一口九九金即以每両8528港銀成交，收市價8570蚊，大升257蚊，唔單止表現叻過恒指紅盤（低收挫853點），更創新春收市升幅紀錄。