鼠年踏入年初六，相信好多人同華華一樣，日日𢭃到冇停手，𢭃乜？梗係利是啦！
今年好多人派利是都特別手鬆，尤其係一班腰纏萬貫嘅地產代理阿頭，幾乎可以用「鬥錢多」嚟形容，派萬零蚊已經係小數目，暫時華華聽到最多嗰個，係預咗五皮嘢嚟封利是。邊個咁豪？之唔係香港置業行政總裁胡日發，同埋利嘉閣董事總經理廖偉強囉。
搵得到怕乜派
胡日發話，噚日港置全線分行第一日開工，除咗逐間分行派公家嘅開工利是之外，私人利是都派到手軟，睇怕埋單3、5萬銀都走唔甩；不過，佢話派利是派得好開心喎。梗係，搵到吖嘛！
廖偉強亦同華華報咗個利是總數，係整整5萬銀，佢每封利是由50到100蚊不等。咁𢭃咗嘅人記住check清楚，不過唔夠數嘅話，有冇得追收先？
至於公家嘅開工利是，今年美聯同港置都係100蚊；中原同利嘉閣就係50雞。