喺「嚴寒」嘅農曆新年假期，極度怕凍嘅敏妮本來想一直留喺溫暖嘅被竇當中，可惜年初一清早，敏妮就要陪爸爸媽媽入屯門同親戚拜年。喺8度嘅天氣下入屯門都未算，仲要一見到親戚就要答問題。
囡囡今年將會入幼稚園嘅表哥，一見到敏妮就話，想搬去名校網，但唔知應該賣咗家陣層樓，喺心儀嘅校網買過層樓好，定係租咗自住層樓畀人，將租金收入喺名校網租過層樓住好。
地區唔同升幅有別
其實租樓定買樓好，答案可以好簡單，就係睇吓你有幾多錢，有錢嘅話，想換樓咪換囉，不過，資金有限，就要從詳計議。首先，表哥家陣自住嘅私人物業按揭雖然已經供滿，但要喺佢心儀嘅名校網買番個咁上下嘅單位，仲要補百幾萬差價。表哥好坦白同敏妮講，雖然預咗筆錢換樓，但仍然要借按揭先夠。
表嫂係全職主婦，加上表姪女今年開始讀書，開支好大，表哥係全家經濟唯一支柱，敏妮唔贊成佢孭樓債。撇除呢個原因，敏妮覺得，仲有幾點要考慮，首先係樓價問題，雖然𠵱家樓市暢旺，表哥層樓升咗唔少，但唔同地區樓價升幅會唔同步，偏偏表哥住嗰區樓價升幅跑輸大市，換言之，佢賣咗層升得唔多嘅樓，去高追已經大升特升嘅樓，冇着數。
減少負債生活輕鬆
敏妮建議表哥，都係租樓化算啲，以佢自住層樓，出租收到5000幾蚊，喺佢心儀個名校網租層差唔多嘅樓，月租大約7000蚊，雖然每個月要補2000蚊差價，但將本來諗住換樓筆錢拎去投資，應該夠幫補。如果真係想換樓，都係等儲夠錢先好，敏妮唔單止係從理財角度出發，試諗吓，表哥已經一身兒女債，孭少筆樓債，生活都輕鬆啲啦。
http://wanmanli.com/blogs/