西環David噚日打嚟推介零售股莎莎國際（178），佢$3.1入咗貨，諗住短炒到4月。莎莎喺鼠年首個交易日高開低收，最多曾升近6%見過$3.28，收報$3.05，跌1.6%。
楊:楊慧玲 孫:孫柏文
黃:亨達集團研究部董事黃敏碩
David：今日想講吓隻莎莎，啱啱喺$3.1買入，睇$3.4，你哋點睇？
楊：點解你睇好𠵱隻股？
D：過年嗰時都幫襯過莎莎，要排晒隊畀錢，又話農曆新年旅客會破紀錄，應該對佢會有幫助，仲有莎莎近日跌唔少，股息回報唔錯，所以想走番轉，發個新年財！
孫：莎莎走勢都幾硬淨，除咗1月22日大跌過，不過可能法國神奇小子都入咗，所以拆倉嗰日跟住跌。
黃：𠵱隻股我都幾鍾意，之前都推介過，原因同David不謀而合。莎莎毛利一路增加，今年亮點係佢內地開舖數目同進度會加快，有機會增加收入，而佢租金成本控制做得幾好，最重要係息率有吸引力，而股價又有推進空間，可做到進可攻、退可守，可中線持有。
楊：莎莎真係好多內地人幫襯！
D：同埋佢嘅管理層冇搵股東笨嘅紀錄，買佢信心都大啲。
孫：佢派息好穩定，有成5厘幾。
楊：好多零售股喺新春之後都會講吓銷情，大家憧憬之下莎莎有機會炒上。
-西環David個案-
買入價：$3.1 目標價：$3.4
止蝕價：$2.8 時期：兩個月
中石油（857）
兩日跌13%抵買
關公：今日推介中石油（857），今日手痕$10.72買咗，目標價$12，𠵱隻股兩日跌咗13%，現價抵買。
黃：中石油最近唔係好跟油價走，跟恒指走多啲，個巿有可能再跌，而中石油A股嘅禁售期完結，連非流通股份變埋流通股份，加重股價下跌壓力。
孫：呢隻重磅股最近被恒指拖累，股價喺$13有阻力。大陸政府打壓油公司，迫佢哋蝕錢都要煉油，加上巿盈率高，都對中石油有影響。
楊：中石油係舊年本港上市公司中最賺錢嘅，而埃克森美孚舊年盈利亦創下美國上市公司歷來新高，今年中石油應該都有得憧憬吓，可以等佢3月公佈業績前入貨。
關公：另外我想推介埋隻國航（753）。
黃：國航要等吓四角戀消息，今日國泰（293）都表示支持國航收購東航（670），𠵱啲消息都對國航股價有支持。
-大埔關公個案-
買入價：$10.72 目標價：$12
止蝕價：$10 時期：三個月
中海油（883）
跌幅唔少想撈底
李先生：想推介中海油（883），因為新年前幾日加埋噚日累積跌咗唔少，再跌嘅機會唔大，所以考慮呢個水位買入。
黃：3隻油股之中我都係睇好中海油，佢對油價敏感度比較高，未來天然氣田嘅產量亦會比中石油高，個股價仲企番喺250天線樓上。
李：如果中海油對油價敏感度比較高，會唔會當油價上番去嘅時候對佢股價有利？
楊：油價上到100美元嘅時候，3隻油股都唔係好跟，所以就算油價再升，中海油都未必可以跟番油價走勢上升。
黃：要留意早前油股已經反映咗油價上升，同埋經濟有可能放緩嘅情況之下，油股調整嘅壓力比較大，分兩注入市比較穩陣。
-旺角李先生建議-
建議買入價：$11.02 目標價：$13.8
止蝕價：$10.8 時期：三個月
中電信（728）
炒重組概念
李小姐：中電信（728）股價喺舊年10月高位$7.22回落到$5.46，建議現價買入，希望3個月內見$7，因為中電信有重組同埋奧運嘅概念。
黃：市場已多次傳出中央今年內公布重組電訊業，電訊股亦多次因為咁而上升，我相信內地電訊業必會重組，但而家單靠𠵱個概念炒作，有啲難度，事關個市波動大，中電信要力抗股市「地心吸力」，到達$7嘅目標價相當難。
李：咁入市價$5.46算唔算高？
黃：$5.2至$5.3係較適合嘅入市位。
李：咁我入市策略應該點？
黃：宜分兩注入市，如果股價見$6.5不妨先獲利一半，事實上，中電信係一隻適合長揸短炒嘅股份。
-屯門李小姐建議-
建議買入價：$5.46 目標價：$7
止蝕價：$5.25 時期：三個月
