利是錢必買！TV╳MP4地上最強

呢個新年，老媽子作戰能力提升至十二成功力！作為佢頭號跟班兼𢭃利是專員，奉搵得嚟使得去原則，跌少少錢買娛樂就點都唔少得！最近黃金腦場新返機仔MP4，首次加入TV接收功能，兼玩打機、收音機、電子相簿、eBook……加埋內置2GB記憶體都係賣$799，實試連商場裏面都收到電視，呢鋪真係靠佢陪我「睇」過年初十！

記者：朱崇德
攝影：王文忠
Model：Eurice

商場室內接收強

呢期樣樣都話高清，呢部國產ainol新返T20竟然咁斗膽仲玩普通電視？Sales笑住話：「你估佢唔想咩？不過須知呢期連機頂盒都未盡完美，仲想偷位做咁細部？唔係唔得！等多一年半載，應該有數碼流動電視啩？」
T20上手，感覺係一張八達通Size，厚度不足1cm；配個2.8吋TFT大芒全黑機身，大抄iPhone。Sales話MP4機一向只係齋睇片，加入TV功能實屬首次！試睇能力感覺幾強，30cm特長伸縮式天線，以Analog制式一吋長、一吋強原則，接收能力真係幾勁。記者喺沙田新城市廣場做室內環境測試，竟然清晰收齊無記、亞記四個台，320×240顯示屏睇起上嚟亦好Fine，冇起格感覺；不過可能芒細關係，如果節目有字幕就會睇得冇咁清，呢樣就冇辦法喇。

■天線伸長可達30cm。

■返到屋企，有直駁天線配備。

■對應國際線路，港、中、美、加、韓都收晒。

商場內部測試：

TV手機同ainolT20基本都收到電視訊號，不過T20明顯對比度高啲，畫面亦冇咁多雪花；惟T20機身喇叭較細聲，一定要插耳筒先聽得到。

地點：
沙田新城市廣場

插卡玩盡多媒體

T20亦一機玩盡多媒體，機身內置2GB記憶體，基本可以玩入片、聽MP3同睇相。測試後感，MP3同MP4聽歌、睇片功能OK，可對應中英文檔案顯示，音效亦算OK。至於睇相方面，由於佢行一般手機常用嘅microSD，用手機影完嘅相可即插入當數碼相簿，Load上過500萬像素都冇問題，不過時間可能要用上五、六秒，呢方面有待改善。其它增值功能還有收音機、電子書閱讀同遊戲機等。