捲入藝人淫照風暴的女主角鍾欣桐（阿嬌），昨日於灣仔英皇集團中心就淫照事件首度開腔，承認自己當年太儍太天真。
阿嬌在淫照事件爆發後，據悉原來曾匿藏於緋聞男友麥浚龍（Juno）家避鋒頭。阿嬌去年初與Juno傳出緋聞，上月27日晚疑似阿嬌的淫照在網上流傳後翌日，Juno忽然取消了商台訪問，接着他到無綫將軍澳電視廣播城錄影節目《與你同心創高峰》期間，又頻頻講電話及用手機發短訊慰問阿嬌。
近日有人到Juno家拜年，便無意中發現阿嬌影蹤。至於Juno兩度對淫照事件回應時均義憤填胸，狂轟拍攝者才是元凶，是渣滓中的渣滓，愛嬌情切表露無遺。
另外，對於阿嬌昨日挺身就淫照事件作出回應，圈中人均表示支持，阿姐就說：「成年人要負責任。」
採訪、攝影：林妃
麥浚龍：佢好硬淨
麥浚龍：
好高興佢能夠積極面對所發生嘅事，之前都講過佢份人好硬淨，希望佢快啲收拾心情，積極投入工作！
汪明荃：反面教材
汪明荃：
阿嬌行出嚟好啲，始終要面對，咁後生避唔到一世。成年人要負責任，希望啲fans會支持佢。當然希望個男仔都出嚟，呢件事影響好大，應該要敢作敢為負責任，件事係反面教材，好多小朋友屋企都有部電腦，上網睇嘢係控制唔到，父母一定要好好分析。
方中信：終要面對
方中信：
阿嬌都要面對㗎啦，佢好勇敢，匿埋都冇用，男嘅都應要返嚟面對，除非以後都匿埋唔返香港，食得鹹魚抵得渴，對我嚟講佢哋都係小朋友，貪玩又不幸漏咗啲相出去，冇人想嘅。我同女友都一把年紀，唔會影呢啲相，以前影菲林㗎。日前我同爾冬陞、薛凱琪班人食飯，攞部DV出嚟個個都驚，大家有DV恐懼症呀。
張堅庭：英俊有害
張堅庭：
阿嬌出嚟面對件事係好嘅，因為逃避都唔係辦法，事件盡早解決傷害性都減到最低，外間係會同情受害者。其實呢次處理手法好高明，特首或者下次有競選團體都應該搵佢哋嘅幕後班底。我都對子女作出反面教材，我同佢哋講將來擇偶唔需要揀靚仔靚女，英俊有時都好大殺傷力。
馬詩慧：勿博同情
馬詩慧：
出嚟交代都係好，都係自己做過嘅事，自己承認做錯嘅事，都係承擔一個責任啦，最緊要係能夠面對，唔喊仲好，唔好用眼淚去博同情，用行動去做，反而更加得到人哋認同。有啲事只要留喺心裏面回味就夠，唔應該草率影相。
房祖名：佢多嘢諗
房祖名：
阿嬌好勇敢，比我04年識佢時成熟咗好多，希望大家可以接受佢，我哋冇私底下傾過呢件事。佢今日出嚟講嘢前我有sms畀佢，但我知佢講嘢有好多嘢要諗，唔想影響佢情緒，所以冇打畀佢。
白韻琴：唔好虛榮
白韻琴：
佢咁講即係默認自己做錯，信錯個壞男人，佢唔講咁耐係啱，因為講多錯多，問落去只會令佢好尷尬，我都信佢以後會洗心革面。我覺得今次事件仲可以等父母教啲仔女唔好盲目崇拜偶像，唔好咁虛榮。
吳浩康：盡量配合
吳浩康：
我有去記者會，阿嬌精神好好，佢好勇敢，公司同咗我哋講，所有公司artist唔會回應太多。我會支持阿嬌，只要有乜需要我都會配合。
