鏞記燒鵝出名，幫襯佢哋嘅客仔仲出名，特首煲呔曾、袋巾梁、政務司司長唐英年、彤叔鄭裕彤、財經名嘴陸叔……都係常客。唔少有頭有面嘅城中名人，每年新正頭都會喺度食開年飯，鏞記酒家第二代掌舵人甘健成話，今年市道好咗，開年飯訂枱已經訂到去初十五。咁有咩名人富豪會嚟開年呢？甘生好口密話唔講得。
大劉冇book枱
據路邊社資料，何超瓊慶祝42歲生日嗰年（4、5年前），就係去鏞記食飯；曾特首未上任前，有一年父親節喺G4護送下同家人到鏞記慶祝。雖然大家都知大劉劉鑾雄至愛係福臨門，但佢有時都會轉口味去食燒鵝，不過甘生話大劉今年冇book枱，話唔定都係去至愛嘅福臨門食開年飯。
甘生話，今年農曆新年前後嘅訂枱情況都好咗，佢哋預留一半枱畀熟客預訂，另一半留畀walkin客，預訂嘅枱一早爆滿。年夜飯同開年飯不嬲都冇套餐叫，今年埋單每圍由五六千蚊嘅平民消費，到萬二銀一圍嘅豪食都有。
八寶鼎6000銀一窩
講到最多人叫嘅梗係招牌菜「發財添豬寶」、「鴻圖翅」，仲有一味至矜貴嘅燉湯──「寶鼎奇珍」，裏面有晒鮑參翅肚，同埋飛潛動植（指飛禽、海產、動物及植物）八大類材料熬成，豐富兼富貴，有幾貴？盛惠6000銀一窩，夠10位用，都有唔少人訂。
電郵：mailto:[email protected]
劃一年賞5000蚊
叫得做名人飯堂，多少有啲個性，中環鏞記不嬲年廿九收市，年卅晚留番玩「私人派對」──老闆同一班夥計團年，有得食、有獎抽，今年尾仲人人攞到5000銀年賞（比上年多七嚿水）。甘健成話，由清潔阿姐到總經理一視同仁，大家都係分到5000銀。辛苦咗成年，算係等大家開心過年啫。
至於今年豬肉、牛肉樣樣都貴晒，甘生話成本貴咗5%，佢哋反映晒喺菜牌上，菜式定價加咗約5%。不過，好多人喺股市搵到食，都唔係好介意，鏞記喺今年團年飯嘅生意額，亦比舊年一成幾。