恭喜發財！恭祝讀者鼠年發大財。今日係港股戊子鼠年首個交易日，一如以往，股場中肯定好多散戶想睇睇港股今日能否紅盤高收。
按過往多年表現，港股在農曆新年假後紅盤高收並不難，不過講到勁，就數10年前的1998年那一次最勁，升幅超過1300點！
中線持有不設止賺
今時今日港股單日升千幾點當然閒事，散戶亦已司空見慣，但10年前港股最高都只係16800點水平，出現狂挾過千點，升幅真係好震撼兼誇張。不過，今年農曆年假期間，美股表現平平，港股今日紅盤能否高開高收仍存疑問，希望鼠年股市有一個好開始啦！
內地雪災緩和，星俠鼠年頭炮心水股係中鐵（390）。中鐵係內地鐵路工程行業龍頭，相信災後重建工程，將於內地春節假後全面開動，可以預期中鐵獲得為數不少的工程，加上中鐵調整至近日低位8.35元應已足夠，料短線底部已建立，伺機買入，持中線不設止賺位，以其上市低位6.70元作止蝕位。