如果將來有人編寫香港互聯網世界嘅歷史，必定會記錄2008年2月10日呢一日，有500個基本上素未謀面嘅網民組織起來，為抗議警方隨意釋法兼選擇性執法，為捍衞網絡資訊自由，上街遊行。事實上，自網上流傳「疑似」藝人淫照嘅風暴爆發以嚟，網民就發揮咗連警察都自愧不如嘅效率同偵探頭腦，一一破解種種疑團。
班網民除咗以極短嘅時間，比對照片嘅場景、相中人嘅身體特徵，嚟印證相片嘅真偽外，連相中極細微嘅枝節都逃唔出佢哋嘅法眼。好似最新一批疑似阿嬌嘅照片，照片旁邊好隱約咁有樽嘢，八方（因為工作關係）睇嘅時候完全冇為意，但有網民就即刻發現，呢樽係潤滑劑，仲連個牌子都搵埋出嚟畀大家對照，原來係KY潤滑劑。
不主張傳相
仲有，疑似阿嬌嘅相中人穿着多款內衣拍照，有網友報料話，啲內衣係英國AgentProvocateur嘅出品，呢個牌子係貴嘢，喺倫敦、紐約、溫哥華、巴黎等城市都有分店，仲話如果係個女仔自己買，證明對個男仔好有心思咁話。八方冇幫襯過呢個牌子，但喺網上睇過啲款，其中一條喺相中出現過嘅內褲，屬於Love呢條line，成一百蚊美金一條，真係唔少嘢。
有個內地網友仲話，打從呢單大新聞day1開始，無論起居生活以至思想情緒都起咗根本性變化。呢位網名叫「村裏的文化人」嘅網友，將自己每日時間表擺上網，除咗洗漱、三餐同埋遛狗之外，基本上其餘時間都係用來搜索新圖，下載到新圖之後，佢仲會揣摩中心思想，又會將新圖老圖對比，思索其中關聯。
發起噚日遊行嘅網友話，唔係主張網友傳播啲相，只係抗議警方嘅執法手段。八方好同意佢嘅講法，今次事件亦證明，網友力量真係唔可以睇小。