阿嬌噚日喺灣仔英皇集團中心見fans同記者，數以百計歌迷、傳媒湧至，英皇中心門外迫滿人好似維園年宵咁墟冚，八方排除萬難迫入場之際，赫然見到前政務司司長許仕仁「肥龍」喺英皇中心行出嚟，點解佢會喺度出現呢？肥龍愛聽歌劇，唔通口味雅俗皆宜都係Twins嘅擁躉，噚日挺身撐阿嬌？
八方明查暗訪，原來噚日肥龍唔係去撐阿嬌，只係去英皇中心地庫間影音店搖擺廊掃貨，買咗幾隻DVD返屋企煲碟。呢間舖頭喺發燒友圈子幾出名，事關有賣一啲冷門、唔大路嘅CD同DVD，連台灣發燒友都慕名幫襯。據講肥龍係熟客，不時嚟掃碟，噚日買咗幾隻西片DVD，好似都係香港冇上畫嘅戲。