古天樂同劉若英繼《生日快樂》之後，再次拍攝張艾嘉執導嘅新片《一個好爸爸》（前名《黑爸爸》），套戲講古仔扮演嘅社團龍頭，同劉若英飾演嘅律師打得火熱，跟住兩個人生咗個女，激發古仔嘅父性，佢想改邪歸正。為咗唔想個女傷心，古仔一直隱瞞自己係黑社會嘅真相，點知呢個時候，江湖腥風血雨，令古仔進退兩難。
主題黑白分明
早排古仔同戲中扮佢個女，唔同年紀嘅兩位小妹妹影電影海報，海報分黑白兩個主題，白嗰款係古仔同大啲嗰個女對打嘅溫馨場面；黑嗰款係古仔坐低，抱住細啲嗰個細路女玩，兩款海報主題雖然唔同，但同樣都充份表達佢嘅父愛。影相嗰陣，古仔個女一時唔小心捽甩古仔身上嘅假紋身，搞到化妝師要重新畫過，不過，工作人員同古仔見個細路女咁可愛，都唔忍心鬧佢，而細路女都好識做，仲同大家講番聲對唔住，令大家順番條氣。