港交所（388）新春開市，主席夏佳理到場打氣，豬年年尾個市好動盪，年三十嗰半日市仲跌千幾點；噚日新春紅盤，大家都好有期望，希望攞番個彩，夏主席梗唔想大眾股民失望。點解咁講，噚日華華見佢出席新春開市時，右手戴住條紅繩，中間穿咗個玉墜掛飾，諗住佢可能想擋煞，等恒指紅盤表現好啲。
華華初初見個玉墜，以為係生肖造型，唔通夏主席鼠年犯太歲？最後睇清楚，原來係佛教代表「萬」字個符號「卍」。華華於是四圍八，先知夏主席早喺上年尾已經戴住條紅手繩，當中原來有段古。
擋唔住紅盤低收
話說上年12月時，夏主席覺得身邊嘅同事輪流唔舒服，經朋友介紹位風水師同佢睇風水，話佢公司對面間寫字樓大裝修，即「動土煞」，於是咪建議夏主席戴番條有個玉墜嘅紅繩囉；據聞，佢屋企同辦公室都有擺風水陣㖭。條紅繩係咪幫到夏主席擋煞，華華就唔知嘞，不過噚日紅盤低開、低收，唔知夏主席會唔會問吓師傅，喺港交所擺番個風水陣，催旺鼠年嘅港股呢？