大年初五人人開市，花旗銀行即搵個真正嘅財神爺嚟大派利是。
點解話真正財神爺呢？因為佢哋唔係隨便搵個人扮財神，而係花旗高層─環球個人銀行服務首席財務總監（即CFO）施瑋信，叫得做CFO嘅，仲唔係財神！
6呎CFO粉墨登場
不過呢位花旗財神唔係中國人，而係印裔人士，施瑋信上年9月先到香港履新，之前喺新加坡花旗銀行做CFO。花旗嘅公關大員同華華講，大家見佢有6呎高夠氣勢，又做CFO呢個位，唔搵佢新年扮財神就嘥晒。
施瑋信對呢個提議亦一口應承，唔介意着住套重甸甸嘅財神衫通街走，仲覺得好新奇得意㖭，佢先去中環花旗銀行分行，跟住去花旗財務，再上寫字樓，噚日行一轉，共派咗1500封利是畀顧客同同事。