身為巴士迷嘅我，以前幾乎一有新巴士模型出，都會即刻走去買，搞到有時會買咗相同嘅款式，後來醒咗，會揀啲經典嘅車款先買，因為咁先有收藏價值。就好似今日介紹嘅DennisDragon同Jubilant冷氣巴士模型，年輕一輩嘅朋友可能未見過佢哋嘅真身，但我哋呢班喺80年代成長嘅香港人，就肯定曾經成為座上客。今日見番佢哋嘅模型，真係好有親切感！
記者：鄭達基
緬懷過海巨龍
仲記得細個嗰陣，每次搭巴士過海都只係見到嗰啲兩軸巴士，但某日經過紅隧口，竟然見到一部三軸九巴出現，嗰一刻真係好開心。長大後先知道佢原來係DennisDragon12米型號，而且仲要係率先到港嘅Demo車之一。今次呢部模型車照足當年嘅真車去做，唔只車頭一樣有個好大Size嘅廠徽，就連下層車尾凹入去嘅部份都做埋，而路線牌仲要顯示當年巴士公司專門用嚟試行新車嘅112號線，夠Classic！
冷氣巴士始祖
喺空調巴士成為主流之前，早喺80年代初，九巴已搶先試用分別由DennisJubliant同LeylandVictoryII所改良而成嘅空調巴士。雖然佢哋都喺83年被拆除空調裝備，變番做普通巴士繼續服務市民，但汗馬功勞實在不可沒。今日呢部模型就係跟足當年DennisJubilant空調巴士嘅模樣去做，車身色彩用咗當年嘅特別塗裝，而且車廂入面仲裝埋高靠背座椅，驟眼望落去同真車好似。
