頭條新聞女主角阿嬌噚日蒲頭，話自己好儍同天真，中國人有句說話「儍人有儍福」，做人有時儍儍哋都唔一定係壞事，成奎安「大儍」、《無間道》儍強、《儍女》陳慧嫻都係靠個儍字人氣急升，睇嚟阿嬌儍唔晒，識得重新定位唔做玉女做儍女，話唔定可以喺娛樂圈長做長有。
其實喺淫照風波中，好儍同天真嘅又豈只阿嬌一個人？其他幾位疑似女角同男主角天真定好儍，八方唔知道，不過好多高官又儍又天真好多人都知。
好似一哥鄧竟成，竟然話管有淫褻照片都可能犯法，搞到網民人心惶惶，仲刺激到佢哋操上街抗議，就真係好儍，如果阿嬌係儍女，一哥應該係全港第一儍佬，堪稱官場「大儍」。
廿幾歲女，喺娛樂圈呢個大染缸浸淫多年嘅阿嬌話自己天真，如果唔係親耳聽到佢講，八方都未必信，不過香港社會反智，好多成年人都好天真，說話好似唔經大腦咁嘅，調查呢單案嘅警官就有辦你睇。黃Sir拉人後話好接近相片源頭，仲認為已經破案，點知唔夠兩日奇拿又出手，新相好似源源不絕，接近源頭呢番說話頓成笑話，連呢啲咁天真嘅說話都講得出，唔通香港人真係集體天真化？
不再天真勇於表態
以前好多人以為網民冇嚟正經信口開河，呢單淫照風暴顯示網民唔儍又唔天真，正所謂經一事、長一智，如果阿嬌真係因為呢件事變得成熟，學似網民咁精明，以後都唔再喺相機（包括儍瓜機）前咁天真做儍事，都未嘗唔係一件好事。阿嬌噚日雖然只係講咗幾句說話，八方聽完諗真啲，覺得都幾有道理，香港人以前都好儍、好天真，以為真係50年不變，其實個世界有乜可能50年不變？大家都係唔好咁天真嘞！
香港人以前見到《基本法》寫住有普選，又好儍、好天真，以為真係有普選，好彩大家儍唔晒，俾老董昆咗幾年亦不再天真，好似阿嬌咁終於成熟咗，齊齊上街爭取民主普選，終於迫煲呔交咗個2017年普選特首時間表出嚟，至於2012年選舉方案係點，大家千祈唔好咁儍同天真喇，要睇清楚內容，有意見就要好似網民咁上街勇於表態。