錢搵得嚟都要識使識享受，華華同中原地產嘅高層傾偈，發現大家都有唔同嗜好，而且都玩得精。
中原董事總經理黃偉雄興趣係音樂，佢話讀書時正係歌神許冠傑火紅年代，讀大學時梗係夾band，之後玩交響樂，喺樂團負責敲擊樂；出嚟做嘢冇時間玩，咪聽音樂囉，佢書房有套音響器材，唔係普通HiFi，而係音響發燒友玩嘅膽機。
黃偉雄話自己未算發燒，只係聽歌可以減壓，最好聽中音嘅純音樂，聽聽吓就瞓着，若然聽太高音容易發夢喎。至於靚聲王之中，佢最鍾意內地HiFi歌后陳潔麗，舊年尾陳潔麗來港表演一場，可惜佢錯過咗。
施永青愛跳探戈
至於中原董事唐秉正鍾情養海洋生物，之前養咗海水魚廿年，最近呢4年改養珊瑚，都算另類，華華唔明養珊瑚有乜嘢睇呢？佢就一副專家口脗話，竅門喺水流控制方面，要用水泵將魚缸嘅水順流，珊瑚先至靚，再加小生物好似蟹仔咁，做成生態系統……睇佢講足成晚都冇問題。
中原個個咁識享受生活，咁老闆施永青又鍾意玩乜呢，唐秉正爆咗老闆鍾意跳舞，話老施不時會同太座齊齊跳探戈，華華下次要捉住老施問吓先。