鼠年報章最大嘅新聞焦點，並唔係香港人物嘅網上圖片，呢啲圖片不論真假，如陶傑所言，不值一哂，香港警察視之為重大案件，大概係香港好太平，治安好，警察冇事做之故。八卦啲講，鼠年或者多啲鼠輩橫行，視美女如日本AV女優，以前啲玩家最多𡁻完唱，𡁻完鬆，現時就興𡁻完騷，騷自己啲獵物在電腦上，以示自己威猛。
大新聞當然係政治大事，台灣首先喺三月選總統，誰人當選會影響台海局勢、香港經濟。假如馬英九順利當選，台海會寧靜一啲，台灣經濟轉好，對香港大局有利。但另一方面，馬英九大可能推動三通，兩岸直航嘅話，國泰航空與港龍航空嘅生意肯定受影響，即係國泰嘅盈利預測要向下調，下調幾多，要問航空界分析師，大家買國泰股票，不可不防。但如果國泰可以申請到開辦台北與上海、台北北京航線嘅話，國泰股票想唔升都幾難。
假如謝長廷靠民進黨啲抹黑招數取勝，台灣走向台獨趨勢較為明顯，台海局勢緊張，三通不成，台灣商人移民走資之勢，就會加強，益晒香港。自私啲講，謝長廷贏，有利香港，不過從大局着想，為台灣同胞着想，都係希望馬英九做總統好啲。
美國大選在十一月舉行，如民主黨贏，美國會走近保護主義、社會主義經濟政策（例如加稅，反自由貿易），對全球不利。共和黨贏，多數保持現狀，中美關係反為更容易調整，故此中國人都係希望共和黨贏好啲。
香港咯喎，八月會有立法會選舉，各路人馬正磨拳擦掌，預備參選，譬如公關界傳出消息，不少政治人物四出尋找公關傳媒顧問，凡係識得搞公關宣傳，有一啲選舉經驗嘅，都不愁冇工做，至於曾經參加特首選舉，陳方安生大戰葉劉淑儀呢兩場「高級戰役」嘅，更加受政治人物「追求」。
可惜吖，因香港選舉經費有限，唔似得台灣咁，一場總統選舉可為台灣《蘋果日報》帶來大量兩黨廣告，喺香港做候選人嘅傳媒顧問，費用唔可以收得高，做幾位都係山大斬埋冇柴，故此並非一盤生意，只合做慣自由人嘅前記者及編輯，為人競選當係做義工，唔係一啲公關公司專才所願意做嘅。