講起政治公關，各路有志競選之士，正周圍搵人，左丁山收到一啲電話，連忙敬謝不敏，請佢哋去搵第二個，不過來人跟住要左丁山介紹，於是一腳傳中去交波畀大記者。大記者去年參加兩項重大戰役，一負一勝，都係事先可以預料到嘅，但係叫做見過大場面，於是受人注目。搵大記者當然好啦，但大記者收到一啲電話之後，急忙推辭，佢話正在享受家庭主婦生活，唔想再度一日二十四小時傷腦筋喎。
參加分區直選，固然要搵傳媒公關，參加小圈子功能團體選舉，亦要搵公關，特別係一啲可能競選比較激烈嘅會計界、資訊科技界、旅遊界、零售界、飲食界等等，大記者憑有志之士搵公關嘅消息，知道上述幾界會有多人競選，戰情不會一面倒。
功能團體乃係政治怪胎，二十幾年前《基本法》草稿徵求意見時，已有好多人指出功能團體易發難收，到按照《基本法》實施普選之時，功能團體會負隅頑抗，阻住地球轉，抗拒民主進程。以前睇見嘅，今日果然如此。並非前人有水晶球，而係世界上所有既得利益團體，點都唔會願意自動解散嘅，此乃古今中外之定律。
北京有位張曉明（國務院港澳辦副主任）曾在香港講過一樣荒謬邏輯，話立法會內之功能組別好重要，佔香港本地生產總值九成，有其存在價值。如果真係咁樣計算嘅，長實和黃集團、恒基兆業集團，滙豐恒生集團等財團在立法會內應佔幾席！好嘞，政府政制及內地事務局向立法會提交資料，列舉現有各功能團體所佔之GDP比例，除咗金融保險及進出口界之外，平均所佔比例甚微，最少嘅就係漁農界，只得（0.1%），鄉議局/區議會更加冇，按張曉明嘅講法，漁農界之立法會議席應該老早取消！
大記者話自人大常委會議認為2017年可以實行特首普選之後，政黨已認識到功能團體跌落長期下降軌，遲早冇行，目前已作兩手準備，一方面負隅頑抗爭取時間，另方面揀蟀操練預備參加直選。加入政界嘅機會，從無如此高漲過。