劉心悠在豬年的工作和健康算是不過不失，除了要為以上兩樣努力之外，她更希望在新一年將自己尚餘的能力，用於慈善上，特別助養貧窮的小孩，讓他們得到支持及鼓勵。
未到農曆新年，劉心悠在數月前已經積極準備在今個月17號舉行的賀年馬拉松，她興奮表示，農曆年是中國人團聚一起慶祝的日子，過萬人以跑步作伴，一起慶賀新年，絕對難忘又有意義，她說：「我上年都有參加，今年一早就開始訓練，希望到時可以應付到，不過我今次只係跑1/4馬拉松，我諗唔會太辛苦，志在參與。」
學日文增值
心悠在自己擁有健康及舒適的生活之餘，她亦考慮到內地以至世界各地，幫助一些生活在貧窮線以下的小朋友，她說：「知道世界有好多貧窮家庭的小朋友，好有需要我哋嘅幫助，無論香港、內地以至非洲，自己都想出一分力，無論幫到幾多，自己都好想去做啲慈善工作，或者助養小朋友，亦都好想身邊人一齊去做。」
心悠表示，在新一年的願望除了身體健康，還希望多些自我增值，她說：「大概4月，我會參與一部同日本演員合作嘅電影，其中有戲份要到日本拍，我喺戲裏面要講流利嘅日文，所以要加緊學習。」
此外，最近劉心悠亦忙於搬新居，她指臨新年尾的工作特別多，但她依然要趕及農曆新年之前，完成搬屋工作，剛巧心悠的媽媽來港陪她度歲，心悠笑指可以乘機找媽媽幫手執拾屋企，心悠說：「因為住開嘅地方租約到期，所以要搵地方搬，今次算是細屋搬大屋，交通方便啲，亦特別搵到有少少保安嘅地方住。」
採訪：張俊銘
攝影：陳順禎
場地提供：圓方
化妝：AnnieGChan
髮型：MarcoLai@ILColpo
