朋友C喺年三十（二月六日）下午提前放工，急急走去維多利亞公園行花市，當日下午冇雨落，天氣雖冷，仍是行花市好時機。正是因為天氣冷，水仙花難開，花檔賣水仙，容易講價。朋友C在當日上午聽電台訪問一位鮮花零售業老闆教路，可以讓水仙浸暖水，再將水仙放在電暖爐旁邊，人為地催谷水仙頭開花。朋友C話不妨趁水仙頭便宜，買回家用此方法試一試。
行花市，當然要周圍望，享受吓氣氛。原來奧運馬術公司亦來擺檔，唔係賣紀念品，而係宣傳今年八月奧運馬術賽、九月傷殘奧運馬術賽。攤檔掛一對聯，上聯係「馬躍香城，全民襄盛舉」下聯係：「術通奧運，百駿競殊榮。」朋友C覺得甚為工整兼且吻合馬術奧運。但最令佢留下印象嘅，係對聯之書法雄渾有力，一睇就知係一流高手嘅墨寶，怎料到奧運馬術有限公司內有如此高人！朋友C竟然因此來電詢問：「喂，你對賽馬好熟，對馬術有冇認識呀？八卦一啲，同我打聽吓呢對對聯出自那位書法家之手？」
佢問我，我問邊個？哈，世界好巧合嘅，左丁山打電話問評馬人余伯樂有何年初三賽馬必贏貼士，佢話只有心水馬啫，不敢話必贏，最穩陣就係買陳有慶先生隻「玉峽生輝」喎。唓！陳會長隻馬，唔使余伯樂講啫，係人都識。順口問佢：「你寫慣對聯，知唔知維園奧運馬術公司嗰對對聯係邊位大師書寫㗎？」余伯樂話：「點解你唔問對聯嘅作者係邊個？」左丁山笑話：「對聯係工整，但令我朋友叫好嘅係書法，唔係對聯！」余伯樂云：「你嘅朋友係有眼光。唔怕講你聽對聯係我作嘅，叫做合格啦。書法就認真唔簡單，係我爸爸親自情商香港著名書法家王齊樂校長客串嘅。」唔怪得啦，王齊樂校長今年年過八十，係上一輩教育家，其書法早享盛名，後輩望塵莫及，而好多後輩亦未必識得王齊樂校長是何許人也，但係高人嘅書法出現在公眾場合，總係有人識得欣賞嘅。