疑似藝人淫照風暴席捲全城，繼疑似陳冠希與鍾欣桐（阿嬌）、陳文媛（Bobo）、張栢芝、顏穎思、前女歌手陳思慧和01年落選華裔小姐陳育嬬等6名女子的淫照被掟上網後，神秘人在昨日又把數張貌似陳冠希現任女友楊永晴（Vincy）的裸照，以及更多疑似栢芝和阿嬌的淫照放上網，今次連圈外人也慘受牽連，圈中人大嘆無辜。身為Vincy堂姊夫的張堅庭昨日更慨嘆說：「我好同情所有受害女仔，叫佢哋以後點面對將來人生，一生就係咁摧毀晒，以後都蒙上陰影。」 採訪、攝影：林妃
張堅庭 呼籲抵制
張堅庭：「我唔相信相中人係我太太（楊諾思）嘅堂妹Vincy，印象中佢好乖女，讀書又勤力。Vincy唔係圈中人，無辜牽涉入其中對佢好傷害。我好同情所有受害女仔，叫佢哋以後點面對將來人生，一生就係咁摧毀晒，以後都蒙上陰影。
我覺得警方呢次嘅處理手法好錯，辣㷫網民，不過網絡世界都應該有自己嘅道德，唔好傷害無辜，我呼籲大家要刪除呢啲相，唔好睇同傳出去。影相嘅人肯定有變態癖好，佢嘅行為好唔正常，大家應該唔好用佢嘅代言產品，用行動抵制佢，好過再互傳呢啲淫照。」
李力持 禁制演出
李力持：「警方又話拉到個源頭嘅？既然知影相嗰個人係變態，應該叫佢避開吓，唔好再出現，娛樂圈唔需要呢啲人，有啲報道話乜乜廣告客戶支持，支乜嘢持啫，如果我係廣告商，我實叫佢回水！其實作為父親，真係唔想小朋友睇到呢啲相，希望大家唔好再推波助瀾登呢啲相。」
袁彌明 濫交冇腦
袁彌明：「影埋咁多呢啲相嗰個人真係絕世大淫魔，咁大量嘅淫照喺網絡流傳，好似成班女仔都係為佢性服務，證明牽涉嘅人都好濫交同冇腦。情侶之間有性行為好正常，但做每樣事情，大家都要諗清楚可唔可以承受任何後果。我覺得有人咁鍾意露械，咁以後最好唔好着褲出街囉！」
王賢誌 行為賤格
王賢誌：「我識得佢（Vincy）全家，佢又唔係圈中人，真係好無辜，新年流流搞到人哋全家人好憂心，希望佢哋一家人互相支持啦。一路有咁多相出嚟，可以睇到影相嗰個人真係好有問題，有咁嘅癖好，喺享受緊情到濃時嗰一刻竟然猛喺度影相，佢究竟係享受緊嗰一刻定係影相？佢一走了之，係幾不負責任，我覺得佢整個行為係好賤格。」
白韻琴 必遭天譴
白韻琴：「吓？楊受成個姪女喎？咁夠薑？我覺得影相嗰個人根本係露體狂同collector，佢梗係覺得自己嗰度好巴閉，個個女仔都用口同佢服務，佢咁鍾意展示佢碌嘢，將佢碌嘢鋸咗去咁就唔會為害人間，呢個男人一定會受到懲罰，就算今日冇，下世一定會有。有啲人呼籲大家唔好睇啲相，但人性冇可能收到之後唔睇，話唔睇好似扮清高，我覺得睇完之後原諒、包容、接受同同情，當冇事發生已經夠啦。」
成龍 事態嚴重
成龍：「乜嘢事我唔知，報道正面新聞，叫廠家捐衣服、棉被去救世軍，比乜新聞都重要。（香港市民亦很關注淫照事件）你哋唔好迫市民去睇，事態嚴重，不願置評，呢個時候講乜都唔啱。」成龍與楊受成關係密切，而昨日出現一批疑似是楊受成姪女，陳冠希女友楊永晴Vincy的裸照，成龍聽罷反問記者：「邊個係Vincy?」當他知道是楊超成女兒後，即說：「多謝。」隨即離開。
林海峰 開騷唔講
林海峰：「我都係想睇番以前周刊謝賢一家嘅團年照多啲，我係想睇正常嘅過年相，而唔係網上𠵱家嘅團年照，總之自己屋企係最安全最開心嘅地方。我電腦壞咗會拎去陳冠希拎去整嗰間舖頭隔籬嗰間度整，其實大家要知道電腦入邊除咗相，仲有好多資料都好易俾人攞到，至於我喺個騷入邊唔會講呢個話題啦，因為要講都講晒，過咗年大家都向前看啦，或者我等到有得加場先講啦，因為幾分鐘都唔夠講。」
泳兒 羞恥事件
泳兒：「我都係啱啱記者講先知又有新相，呢啲人（發放人）好冇公德，件事咁耐應該要懲罰，大家有相就刪除同唔好再發放，我覺得今次件事有啲羞恥，唔止香港，喺互聯網全球性發放，重要有其他國家嚟採訪。」
鍾舒漫 贊成收監
鍾舒漫：「完全未睇過新相，我之前喺Edison公司派對見到Vincy，未睇過啲相唔知係咪佢。之前網友收監八個禮拜，我覺得政府判決有原因，係想提醒網民唔好犯事，我唔可以評論，但比較對網友判罰，其實佢對當事人嘅傷害重大，懲罰有佢原因。」
徐子珊 睇到心噏
徐子珊：「我身為女藝人，見到啲相都覺得好心噏，唔想再睇到，都唔想去評論，因為係其他人嘅事，只係想快啲結束件事，新年都唔想再睇呢啲相，快啲完結。」
