Materia拜年　路路亨通

Materia拜年　路路亨通

新年新願望，人人賺到盤滿缽滿，身體健康笑口常開！
自問好怕新正頭同阿爸阿媽去親戚朋友屋企拜年，利是唔怕多，至怕係揸車出入搵位泊車麻煩囉！今年有咗小「型」車Materia，拜年就完全唔同晒，你有你有禮，我有我通行無阻兼路路亨通，爽！

記者：梁美甜
攝影：陳陶鈞、周旭文
模特兒：Suyen

車仔細　左穿右插好拜年

由細到大都覺得，新年最令人興奮嘅莫過於𢭃利是，最好就係唔使山長水遠去拜年都有利是𢭃嗰隻喇，因為諗起要揸車就怕怕！搵唔到車位不特止，由於人人都亂泊，結果即使畀你搵到位，都窄到擺明要考功夫。去街市辦年貨嘅地方仲誇張，DoublePark甚至TriblePark都有，你估玩Scrabble咩！今年揸住bB姊妹型仔車Materia，青綠色Sharp到隔成條街都睇到，細車格局至啱左穿右插偷位攝位霸靚位，青馬三號幹線龍翔道高速大路路路通，連清水灣道大棠旺角小路窄巷都通行無阻，行得爽連拜年都精神爽利過人！

■好多細車嘅先天缺陷就係空間細，Materia絕對Abnormal，細車Size但空間大而開揚。

■前座兩旁各置有藍光喇叭，開住機揸車，成個小型流動Disco咁，型得很。

■軚同腳踏都係MOMO，跑車設置，但唔好期望佢係部車跑呀！

■中控台設計簡約，兩面獨立出風口。

空間大　載人載貨話咁易

你一定以為細車載人載物都少，Sorry囉，呢次你大錯特錯，因為Materia叫得五人MPV，坐得落一家三口加多兩老仲好闊落，後座小朋友隨時腳FingFing兼尾廂仲擺得落成堆拜年禮物同回禮㖭！人少少仲盞，Materia車長3,800mm，前排可以大幅度滑嚟滑去校個靚位，拜年行到攰攰哋仲可以放平椅背攤唞吓，又可以開住附設藍光喇叭嘅音響，開行六個喇叭播勁歌嚟個開年MiniConcert都仲得。

■坐足五個人，再擺埋成車拜年手信都唔覺逼狹，一口氣走多幾轉拜年都仲得呀。

■Materia標榜空間大，揭開尾門摺埋後排，多位到你唔信。

■後排坐三個大人絕對無問題，就算天冷着到成隻糭咁，都有位剩。

方匣仔　改裝自主兼慳油

時下好多人都鍾意改裝自己部車仔，有自家風格之餘又搶收視，尤其係潮人一族就更甚。Materia同姊妹車bB一樣，方匣仔外形同又大又開揚嘅內櫳都提供足夠嘅創作改裝空間畀大家，就連代理都喺Showroom設咗個專櫃，售賣改裝權威Garson嘅車飾同配件，夠晒體貼。
車仔另外優勝之處就係夠慳油，以Materia為例，未過年辦年貨到新正頭拜年行勻港九新界，打爆油缸1,500c.c.可以行足3日多，1.8又好2.0甚至3.0都好，不過就一定唔同價囉，點計Materia都慳一半有多，計埋可以攝位、搶收視兼易泊位，呢勻點計都贏喇！

■雖無大車房車咁跑得，但行走市區就足夠有餘。

出入好Easy

■細車最正嘅地方莫過於東穿西插，咁窄嘅位一樣攝得入。

■過年過節成街係車又係人，不過Materia出車一樣無難度。

■左一手右一手，行得，好Easy！

規格表

DaihatsuMateria五人MPV
引擎：1,498c.c直4DOHC連DVVT引擎
馬力：103ps/6,000rpm
扭力：138Nm/4,400rpm
傳動：四前速自動波
驅動：前輪驅動
尺碼：3,800x1,690x1,635mm
售價：$146,880
查詢：皇冠汽車（24766138）

Daihatsu進駐豐田陳列室

Daihatsu被豐田收歸旗下已經好一段日子，之前從未試過踏入過豐田陳列室，想要睇車試車都要去Daihatsu型車館，即Showroom。直至上個月尾，Daihatsu終於正式進駐集團Showroom，𠵱家除咗Daihatsu品牌Showroom之外，去各個豐田Showroom都可以睇到Materia等一系列小「型」車喇！

■大型倒後鏡飾鏈及Swarovski水晶毛毛鏈（$1,050起）。

■Daihatsu型車館兼賣改裝權威Garson嘅改裝件及Swarovski水晶汽車飾物。