新年出去行街或者拜年，最怕就係去到想泊部車入去嘅停車場門口，先見到原來個停車場已經Full咗，搞到自己尷尷尬尬，入後波倒後駛出去又唔係，繼續排隊等又唔係，真係諗起都覺得麻煩！
正正因為咁，呢幾年好多停車場都喺停車場入口同唔同角落，加咗好多剩餘車位數目嘅顯示屏，等各位揸車嘅朋友唔使再遇到呢類咁尷尬嘅情景。嗱，就好似旺角新世紀廣場咁吖，佢哋喺去年11月左右為停車場加裝咗泊車指引系統。呢套系統喺每個車位上面都加裝感應器，如果感應器探測到有汽車泊喺上面，就會傳送訊號去到設於唔同地方嘅顯示屏，令揸車嘅朋友慳番唔少搵位泊車嘅時間。唔知本港其他大型商場會唔會效法佢哋，喺停車場入面加裝呢套咁有用嘅泊車指引系統呢？
記者：鄭達基
