於上月27日第一張淫照曝光前，陳冠希（Edison）與舒淇頻頻合作，舒淇除為Edison拍了一輯CLOTFantasy照片外，二人還一起為本報拍攝了一輯賀年照片。一向洋化的Edison，對過年沒有太大感覺，而傳統的舒淇就好遺憾今年要在柏林過年，不能回台灣老家過節。
陳冠希因為淫照事件被公司要求放大假，身在美國波士頓的他在女友楊永晴（Vincy）陪伴下度春節，不過近期因為發生這麼多事，相信Edison也提不起勁慶祝新年，但本月14日的情人節，他會繼續留在美國陪女友，估計本月底才會返港。
在出事前幾天，Edison應本報之邀與舒淇拍攝一輯賀年照片，當時他接受訪問時心情極佳，暢談對農曆年的感覺，他說：「可能因為我喺外國居住時間比較長，所以對中國新年唔係咁注重，不過我記得細個喺加拿大住嗰時，有一年曾經𢭃咗成3,000加幣（約23,210港元）利是，當時真係好開心，但我從來唔會喺過年時走到長輩身邊講恭喜發財，然後等人畀利是，我覺得咁做好核突。」
編派利是名單
開了公司做CEO後，Edison指自己今年應該要派利是給員工，為免掛一漏萬，他早已寫好一張派利是名單，他說：「有啲人平日好幫忙，但未必成日見到，所以我一定要寫低要畀利是呢啲朋友，不過今個新年我唔喺香港過，可能要返到香港補畀人啦！其實我對大時大節冇太大感覺，但每年春節前，維園都擠滿人，真係好得人驚。以前細個喺加拿大過年，一家人喺屋企食完團年飯就會食吓蘿蔔糕，但今年媽咪、家姐喺加拿大，爹哋喺香港，大家就要分開過節啦。」
舒淇在今個春節因為要到德國擔任柏林影展評審，所以不能回台過年，台灣家人和親友們都感到很失望，她說：「雖然每年春節我盡量會返台灣過，因為呢啲大時大節一家人過，熱熱鬧鬧先開心，但柏林影展今年咁難得搵我做評審，自己又想做，所以今年惟有過年食德國腸、飲德國啤慶祝啦！」
做評審不偏私
舒淇於上月底已經抵達德國柏林，昨日她表示這幾天在德國都是看電影，因為幾位評審看完戲後就要開會研討，舒淇說：「我所知香港就只有杜琪峯嘅《文雀》參賽，不過我做人好公平，絕對唔會偏私，做評審都係以片論片，邊部戲好，我就投票畀邊部戲。」
前幾年可以回台過年，舒淇開心說：「喺台灣過年同20位親人一齊食飯，真係好開心，大年初一至三又可以開賭局，同表弟妹玩魚蝦蟹，我做莊，贏晒佢哋啲錢後，我都會派番畀佢哋，等一家人可以開開心心。」
採訪：李珮洳、陳月媚
攝影：陳志嵐
協力：陳慧安
化妝：PuiPui（舒淇）、MoeLuiofii/PoChan（陳冠希）
髮型：SevofHairCulture
服裝：Clot
場地提供：馬可孛羅香港酒店
