拍緊拖嘅你，今日年初二唔想去拜年或者出街同人迫，咁不如揸住自己部愛驅，同Honey走去郊外避吓靜，實行邊望海邊談心，跟住再品嚐一下中式美食，夜啲再出番市區睇煙花，咁樣享受二人世界，係咪好正呢？
記者：鄭達基
攝影：楊錦文
模特兒：Brad、Carey
鳴謝：BMWHK（27145271）
首站 新娘潭
6號燒烤場多車位
唔少情侶喺農曆新年嗰陣都唔太想拜年，又唔想出街同人迫餐懵，想順便趁機享受一下二人世界，郊外可以話係最好嘅選擇；要夠晒寧靜同方便泊車嘅地點，我首推位於新娘潭路一帶嘅郊遊地點。
呢啲郊遊地點好處係數量多得嚇人，幾乎揸車行唔夠500至800米就有一個，而且旁邊大多數有空地，方便大家泊車，好似6號燒烤場咁就係啦；至於另一個賣點，就梗係呢啲地方唔少都係面對住船灣淡水湖，好天嘅話完全有湖光山色Feel，同愛侶喺度談心，又或者喺度求婚肯定SureWin呀！不過有樣嘢要提提大家，就係呢幾日天氣都比較凍，要去呢度嘅話就記得要着定多件衫啦！
行車貼士：新娘潭路彎多路急，車速勿太高；另路旁有可供泊車嘅大空地，但要留意路旁有否斜壆方便駛上空地。
泊車貼士：6號燒烤場旁邊有大空地，可停泊約6至8部車，但由於屬沙地及部份位置係隱蔽兼低矮嘅斜坡，泊車時要份外小心。
第二站 鹿頸
參拜天后再嚐美食
離開船灣淡水湖，續沿新娘潭路轉往鹿頸路，雖然有部份路段係單線雙程行車，見到對頭有車就要閃入避車處讓路，但唔使10分鐘就可以嚟到南涌天后宮；將車泊喺旁邊嘅空地之後，就係參拜嘅好時機，呢度香火鼎盛並面向大海，參拜過後更可同Honey欣賞一下海景和對岸沙頭角一帶嘅景致。
談心談咗咁耐講到口水都亁？大可折返位於鹿頸村嘅B.B.開心士多補給一下；咩話，兩口子個肚仔一齊打鼓叫肚餓？無問題，因為看舖嘅靚姐推介我哋去B.B.開心棧，試吓佢哋聞名嘅招牌鹽焗雞喎。呢間B.B.開心棧喺大美督巴士總站附近，最出名嘅除咗有惹味兼肉質嫩滑嘅招牌鹽焗雞外，仲有愛牛人士必食嘅五香牛筋腩，同埋滑到你唔信嘅豆腐花，YummyYummy！
行車貼士：通往南涌天后宮嘅部份鹿頸路屬單線雙程行車，要留意有否迎頭車輛。
泊車貼士：南涌天后宮側有空地泊車，而新娘潭路新壆亭旁邊設有免費車位，並要緊記唔好將車泊喺避車處。
尾站 尖沙嘴
Shopping過後賞煙花
睇睇錶已經係下晝接近4時，都係時候揸車出番市區，預備同Honey拖住手仔睇煙花，建議取道新娘潭路接吐露港公路，再經獅子山隧道出番市區，話咁快就嚟到尖沙嘴柯士甸道西駛入圓方，跟住指示就可以駛入停車場，泊好車之後就梗係同女友去Shopping同食番個燭光晚餐先啦！
食飽飽之後，就係時候同女友拖住手，慢慢沿雅翔道步行過去西九龍海濱長廊，最好早些少過去霸定個靚位，可以借機幫Honey影番張有煙花做背景嘅靚相之外，仲可以感受吓節日氣氛。嘩，真係諗起都冧！
行車貼士：若經柯士甸道西及雅翔道天橋轉入圓方嘅停車場時，小心橋上有急彎，並要在首個燈位轉右。
泊車貼士：圓方嘅停車場每小時收費$8，若喺商場內消費滿$180可享3小時免費泊車，消費滿$400即可享4小時免費泊車。
店舖資料
B.B.開心士多
營業時間：7:00am-7:30pm
地址：沙頭角鹿頸村2-3號（26559889）
B.B.開心棧
營業時間：10:00am-11:00pm
地址：大埔大美督龍尾村60號（29476633）
遊車河好幫手
寶馬330iACabrio 電動硬摺頂一按即開
今日帶大家遊車河嘅寶馬330iACabrio開篷跑車，齋睇賣相已夠潮夠型，佢仲係BMW首部配備三摺式硬頂嘅開篷跑車，開篷關篷夠快夠Easy外，車廂空間又夠闊落舒服，打破硬篷無位座嘅定律。
咁仲唔只，330iACabrio所用嘅引擎係一台3.0公升直6型號，淨係計馬力輸出都已經有成272匹，加埋波箱係6前速Steptronic半自動款式，想扮吓車手威畀女友睇，真係話都無咁易！
BMW330iACabrio規格
引擎：2,996c.c.直6DOHC
馬力：272hp/6,650rpm
扭力：315Nm/2,750rpm
傳動：6前速Steptronic半自動波，後輪驅動
售價：$653,000