初三有乜搞？唔使講，梗係去拜車公！作個福兼轉埋風車，求鼠年順風順水。不過根據高萌禧師傅所講，轉風車記得咪亂嚟，舊年順風順水行好運，轉風車時就要順時針；反之，如果運滯唔順景，風車就要逆時針轉。轉錯方向嘅話，好運變衰運就大件事啦！明未？好，係時候出發啦！
記者：黎頌詩
攝影：伍慶泉
Model：Brad、Suki
鳴謝：方海閱師傅、高萌禧師傅
拜得醒貼士：
大圍站最近：
近年港鐵多咗個車公廟站，咁去車公廟係咪更就腳？如果你係拜車公初哥，咁就要醒啲啦！由車公廟站去車公廟，路程反而遠咗一半，除非諗住行大運，否則都係喺大圍站落車近啲。
校啱時辰：
拜車公唔同上頭炷香，毋須爭先恐後。高師傅話如果校啱時辰就更好；其中以早上5至11時前最佳，下午1至3時都唔錯，至於早上11至下午1時同下午3至5時，就唔係咁好啦。
記得洗手：
拜車公無乜指定祭品同禁忌，本來傳統拜車公一定有燒肉，不過所謂心誠則靈，幾炷清香都一樣得。但高師傅特別提醒一眾污糟貓，去完廁所記住洗手先入廟拜神，否則即係對神靈不敬。
參拜有程序
車公廟一向香火鼎盛，新正頭更係人山人海，為令善信們個個都可以向車公作個福，入廟拜神唔該守規矩，跟番傳統步驟：
1.買車公衣：
今日人多擠迫，想輕裝出發都得，因為香燭同車公衣等物品，都可以喺廟內外嘅攤檔買到，價錢當然會比外面貴些少。究竟邊種拜神套裝最啱你，大可請教檔主。
2.敲天鼓報到：
拜神嘅第一步係響天鼓，目的係通知車公你「到埗」，平時天鼓同風車呢兩樣寶貝都會放喺大殿內，不過今日人潮迫爆車公廟，天鼓、風車都搬出正殿，要敲要轉請排隊。
3.點香有人代勞：
廟內唔准自行生火，點香有工作人員代勞；認住廟前廣場左右兩邊點香處，添香油同點香都喺呢度，如果有大大支嘅香燭，都要喺呢個時候點埋，因為唔可以拎入正殿㗎。
4.殿外奉祭品：
參拜要由外到內，首先要喺正殿外參拜，正殿外中央嘅祭壇有三個香爐，每個香爐要上香三炷，食物等祭品都要喺呢個地方供奉，隻燒豬係時候拎出嚟啦。
5.三炷香入正殿：
喺外面祭壇拜完就要入正殿，記住，呢個時候人人都只可以帶住三炷清香入廟，咁都係為咗大家嘅安全啫。
6.逆時針轉走衰運：
稟完神，係時候轉風車。高師傅教路，轉風車男用左手女用右手，想轉走衰氣記得逆時針轉，寓意將運數逆轉；如果順風順水，則順時針轉就可Keep住好運。方海閱師傅補充話呢啲可算係意識行為，若呢兩年較不順景嘅，不妨一試。
7.職員代化寶：
最後步驟係化寶，不過基於環保理由，車公廟唔會畀你自行化寶。各位善信唔使怕車公唔知你有心，因為廟內設有聚寶車，將車公衣同元寶放入去，職員自會代勞。
8.誠心求籤：
拜車公本來唔一定要求籤，不過唔少人拜完神都習慣求籤，可於正殿誠心下跪，一籤問一事，然後去解籤處花$5拎籤紙，$10就可以請人解籤啦。
9.買風車：
返歸前，唔好唔記得買番個風車，呢個雖然唔係參拜指定動作，只係攞個好意頭。風車唔在乎大細，但就一定要轉得順暢，寓意事事順景。
開放時間：
沙田車公廟於2月8日（初二）晚上11時起通宵開放至2月9日（初三）下午5時30分
買個好意頭
拜完車公梗係買風車啦，大細唔拘，最平嘅十幾蚊就買到。除咗風車，車公廟外面嘅攤檔仲有唔少新年掛飾，不過就以傳統款式同熟口熟面嘅居多，檔主左摷右摷，向我哋推介以下新面孔：
兩間車公廟有乜分別？
自從N年前某高官喺車公廟求咗支下纖、結果嗰年香港就真係衰到貼地，所以喺港人心中，車公的確好靈好勁！不過你又知唔知，車公生前一樣夠神武？話說車公本屬南宋名將，宋末護駕南來卻中途病逝，村民被佢忠心感動，於是建廟供奉，就係𠵱家喺西貢蠔涌嘅車公古廟。到明末，沙田被疫病肆虐，村民希望請得車公出巡驅疫，但西貢村民只畀沙田村民帶走車公孫兒嘅神主牌，結果車公孫兒一樣唔小嘢，3日後瘟疫消失，村民當然即時要建廟供奉啦。
幾百年後嘅今日，沙田車公廟嘅香火更盛。咁，拜邊間先啱呢？答案係：今日拜沙田。因為蠔涌車公誕係農曆三月初三呀！
善信齊撐
睇睇嚟車公廟嘅善信，真係男女老幼都有，個個都異口同聲，話車公好靈，上年都如願，今年又要嚟許願。
