喺度先同〈開倉版〉嘅擁躉拜年，祝各位橫財就手，波運亨通，鼠年贏到牛年！新正頭頭威頭勢，捧硬熱刺作客劏「羊」（打比郡）齊齊收錢！
近排呢個地盤連小弟喺名家擂台嘅氣勢返晒嚟，過去兩個周末贏回近萬分，續向歸本路進發，策略續以小注博過關。賭錢無必勝，平常心壓力減反能做到已故驃叔所謂福至心靈，長玩長有。重心捧熱刺，雖為愛隊阿仙奴死敵，但賭波最忌同錢拗氣，明明一睇排位表有信心，冇理由因為非我族類而捨棄；熱刺上周已差點破數據，氣走曼聯，拉莫斯同班主利維再狂掟錢買人，點都要有交代嘞，事實證明鬥英超兩大勁旅，皆顯示不落下風。
熱刺走勢勁打比救唔番
熱刺目前排11位，我嘅睇法同歇冬後捧AC米蘭一樣，起碼會上番前5、6位，「A米」1月份喺聯賽取得5勝1負，熱刺估計會有相類似走勢，適逢今作客鬥魚腩打比郡，良機至。雖然熱刺今役有新加盟嘅中堅活基治停賽，不過球隊以攻為守，未必唔係好事。打比郡喺1月轉會市場狂買2、3線兵換血，只屬聊盡人事，新兵有老悍將沙維治及叛將賀森加利，後防有35歲嘅史杜比斯，用呢類球員擔正難擋熱刺嘅快速銳利攻勢，上仗靠阿根廷兵艾曼紐韋拿完場前入波，爆冷打和伯明翰有幸運成份，但逐分攞已可斷言救唔到命，領隊祖維爾策略會開始傾向稍為進取博3分，必中正主攻嘅熱刺下懷。入球「大」穩執，當全日過關膽，進取者博2.4倍嘅「讓球主客和」熱刺[-1]「客勝」啦！
配腳取英冠修咸頓博入球「大」，主場迎戰昆士柏流浪，勝負難料，反而雙方攻力相當；至於荷甲，捧飛燕諾作客贏廸加史卓普，前者近3戰不勝，喺時候反底，射手馬卡爾唞番一個禮拜有望攻破回落嘅升班馬廸加史卓普嘅防線。
近5場往績：贏贏輸輸贏
蘋果波神
英超波癡有一個心願，5月話你知！