餐廳羅最近為咗啲食物原材料來價大漲而大傷腦筋，豬牛肉價錢上升，人所皆知，但歐洲牛油、牛奶等等，來價大升，原因係歐盟逐步取消或削減乳酪產品津貼，歐洲農民認為冇津貼就無利可圖，大舉減產，於是霎時間，牛油大漲價，仲未必搵到貨。
餐廳羅呻材料加價之餘，更為最大嘅成本項目──租金頭痛，佢做落之餐廳，裝修費用不小，熟客甚多，好難搬嘅，業主睇中呢點，租約期滿就狂加租，問佢點頂。第二大成本就係員工薪酬嘞，佢聽到全行人手都俾澳門酒店搶，年中之前有一百個餐飲經理離港赴濠江，香港食肆根本無力招架。
飲料L就叫餐廳羅加價，一於將全部成本轉嫁畀顧客。飲料L話荷李活道、雲咸街一帶，租金狂升，好多古董舖，畫廊已經冇法子夠新派餐廳搶，逐間搬，長此下去，外國遊客慕名而到荷李活道睇古董，只會見到西餐廳與酒吧。餐廳點解可以交咁貴嘅租金呢？無他者，賣得貴吖嘛。飲料L間小舖位於荷李活道，附近有一間新開業嘅餐廳，專賣漢堡包，每客三百大元，雲咸街有間和牛專門店，人客行入去，最少都要擺低一張大牛，與拖友入去，一張金牛剛啱冇找，但晚晚其門如市。
餐廳羅話：「你哋啲外行人以為好掂者，實質七除八拆之後，只係替業主打工。」咦，食和牛要五百零，左丁山明白，食漢堡包要三百？喺麥記請客都得啦。飲料L話：「你又有代溝嘞，間漢堡包店嘅老闆，聽講只係二十四歲嘅女孩子，自紐約讀完書回來，父親係炒樓天王，蘇豪區一帶有唔少物業係佢哋家族嘅，佢哋本來做玩具，後來見到炒樓好玩，愈炒愈大，地產經紀見到呢對炒樓兄弟就嗒晒糖。」
原來如此，做太子女係幸福嘅，至於你同我有冇興趣食一個價錢三百元嘅漢堡包，係另外一回事。寫到呢度，電腦J打電話嚟嗌死，話佢嘅雲咸街寫字樓要加租五成，無法子負擔，可能要搬去鰂魚涌工業大廈。佢話佢間大廈有唔少單位俾啲餐廳租咗嚟做貨倉，就快逼到佢冇路行咯喎。