新年前，劉校長邀請一啲傳媒界校友到校長住所吃飯，因為一啲老總級人物多數晚上要開會，往來沙田山頭，較為不便，所以冇嚟。唔緊要啦，中大傳訊總監Amy話會陸續安排在市區與另外一兩批吃午飯，時間就要互相遷就嘞。
大學校長住所之中，左丁山去過以前城大張校長、港大徐校長、中大劉校長三位府上吃午飯晚飯。張校長每月辦文化沙龍，因為城大校長居所位於加多利山，客廳寬敞，可容四五十人坐在一起，搞文化講座好適合，左丁山去過幾次「文化沙龍」，吃張校長夫人監督菲傭自製自助餐，印象甚佳。港大校長府邸位於大學校園最高處，飯廳可容一席，外邊樹木甚多，幾乎遮晒海景，又另有一棵好似叫做印度松，體形龐大，樹根向四周延伸，據一位樹木專家講，呢棵印度松已對住所渠管構成威脅，印度松不宜在住宅或任何建築物二十公呎內種植；聽講港大啲專家教授已為徐校長想辦法如何應付這棵具「侵略性」之印度松。
劉校長府邸名「漢園」，位於大埔道上山頂，居高臨下，望晒整個中大校園與馬鞍山一帶，景觀十分好。「漢園」建於一九六○年代，當時新界土地唔值錢，幾毫子一呎，港英政府撥劃一個山頭畀中大建築校長宿舍，今日看似十分慷慨，當年只係舉手之勞耳。「漢園」已有四十餘年歷史，裝修簡樸，勝在室外平坦，草地面積大，有網球場，可以辦園遊會，劉校長話以前就曾辦過一次籌款，由校長燒烤「校長牛扒」，二十幾三十人參加，籌到十六萬元。
呢晚大家又係食校長牛扒，此牛扒有劉校長秘方，PaloAlto（史丹福大學所在地，劉校長以前在史丹福教經濟學）曾有雜誌讚不絕口，社長Ｌ此晚亦猛話好味道。社長Ｌ話在學生時代，曾做過示威分子，自中大校園操上「漢園」閘口出面嗌口號，嘈住李卓敏校長，但從未踏足園內。老總Ｃ以前係中大學生會會長，對社長Ｌ講：「文藝一啲講，從屋外到門內，這一步走了三十年。」左丁山亦笑言：「昔為門外生，今為座上客，值得你多飲一杯清茶！」