【本報訊】克羅地亞勁旅夏德，昨日在鼠年賀歲盃壓軸大戰，憑前鋒柏度奴域梅開二度，協助球隊以2:1反勝南韓蔚山現代，殺入初四決賽與港聯爭冠軍。
安歷完場前收「利是」
儘管夏德目前仍處國內賽事竭冬階段，普遍球員均未在最佳狀態，但由於隊中有杜陀、施夫高域等高質球員，加上前鋒柏杜奴域腳風奇順，昨仗兩度射破前南韓國腳金永光十指關。夏德能夠反勝演出不算太差的蔚山現代，足證這支歐洲代表在今屆賀歲盃，確具冠軍相。
夏德教練贊尼賽後表示：「我很高興球隊打出爭勝決心，除了門將華高廸狀態較差外，其餘球員均有不俗演出。」對於周日面對港聯爭冠軍，贊尼不評論主隊實力，他補充：「港聯對烏拉圭排出4-3-2-1的陣式很特別，這點是值得尊重的，不過，決賽我們一定能夠擊敗他們，將獎盃帶回家鄉。」由於夏德中場安歷完場前10分鐘直接領紅牌，這名翼鋒將缺席決賽。
蔚山現代教練金正男表示：「其實球隊發揮還算可以，亦能控制比賽節奏，只是對方陣中有一名出色的前鋒（指柏杜奴域）。」
《花絮》
夏德球迷大搞氣氛
大球場球迷唔算多，現場座位疏疏落落，好在尾場有一班夏德球迷，佢哋掛晒國旗、會旗為球隊打氣，而且全場不停唱歌，喺咁凍嘅天氣下都有啲大戰熱鬧氣氛，呢場壓軸戰都算有番啲睇頭。
港聯球員唔識唱國歌
足總噚日邀請譚詠麟、李克勤及彭健新，為港聯獻唱中國國歌。不過，因為港聯大部份屬巴西兵，華人只有潘耀焯、李志豪、陳肇麒及李海強4位，當中跟住「左麟右李」一齊唱國歌嘅，更只有前中國國腳李海強。電視廣告提到嘅公民意識，睇怕呢班球員都冇睇過。
中場休息大鑼大鼓
今屆賀歲盃除咗一如以往嘅醒獅表演外，足總特別邀請一隊敲擊樂隊，喺中場休息時為球迷助興。表演者準備6、7個大鼓（下圖），有巴西及中國鼓，再配合一班小朋友的手搖鼓，都可以奏出李克勤嘅流行曲《紅日》。
