新年團拜，一班人柴娃娃迫喺間屋仔入面，唔通真係你眼望我眼等食飯？儘管閒日唔好賭的，都會趁新年時間圍埋齊齊打牌、鬥地主、魚蝦蟹，聯誼一番。加埋今日年初三，一年一度的賀歲馬都特別熱鬧，個個都想發新年財攞個好意頭。要財運得心應手？今日請來昇龍師傅教路，認清自己五行，着啱顏色衫、坐啱財位、做足奇門出行財方術，自然就更容易財運亨通啦。
記者：許維雅
攝影：伍慶泉
Model：Color、Stella、Cynthia、Michael
鳴謝：亁坤風水玄學顧問昇龍師傅
第一招 賭錢要贏着衫要「色」
新年流流，能夠發個新年財，係中國人希望得好意頭的傳統心態。玄學顧問昇龍師傅認為只要能配合玄機，知己知彼，就可以有機會立於不敗之地。從玄學角度，萬物都有陰陽，只要知道自己命格，配合顏色及方位，取得優勢而攻，乘旺而可以得利。師傅十分有信心力證：「之前帶學生過澳門賭場上堂，佢哋話想入去玩吓，我就教佢哋點行，企咩位玩。贏咗錢，之後成班去食飯囉。」嘩！點解贏錢可以講到咁Casual。所以第一樣要做的，就係要知道命格，配合顏色去催旺自己財運。要知道自己的出生年月日及時間，查出自己命格屬五行的金、木、水、火定土，再按五行而認清自己的催財顏色。着啱催財顏色衫，入馬場或打牌都必然會有幫助。
五行屬壬、癸水的，今日慎防有財來，有財去，亦屬小賭怡情類。催財顏色為綠、青，因木生火，火為水之財。
五行屬甲、乙木的，今日會有小財，但不能貪多。着一些紅色衫或粉紅色衫，可催旺財運，但記住見好即收。
五行屬丙、丁火的，今日財運可能不如理想，只可小賭。催財顏色為黃，因黃屬土，土可以生金，金係火之財。
五行屬庚、辛金的，今日財運最佳。木係金之財，顏色如黑色或深藍主水，水可生木，木有助金加強財運。乘今日強勢出擊，新年財必能得心應手。
五行屬戊、己土的，今日容易口舌破財，其實不宜賭博。命格的催財顏色為白色或金色，金可生水，水為土之財。若然今日催財顏色都幫你唔到，惟有記住多着金色衫，之後大把機會發新年財。
第二招 朝早11點先好出門
至於出門口去馬場前有甚麼準備，師傅就講出一招奇門出行財方術：「想再加強財運，只要今日中午11時至1時出門口，以自己住宅為中心，向西南方向行10分鐘，慢慢迎接財神吸財氣，然後先慢慢搭車去馬場。呢一招十分重要，對今日財運有好大幫助。最重要當然要夠精神，個人沒精打采，想贏錢都難。」
第三招 坐正財位贏錢冇難度
要發財更順利，昇龍師傅就話每個時辰，財位都會有所不同，大家可以根據奇門的財位方而坐，咁就會更容易贏錢。財位位置係根據奇門遁甲計算出來，今日為己卯日，跑馬大概由下午1時開始，今日下午1點至3點，財位於西北；下午3點至5點，財位於正西；下午5點至7點，財位於東北方。只要買馬或賭錢時，記緊跟足以上財位而坐。至於馬會大門入口，停車場及巴士入口處位於正西，火車站入口位於西北，兩個方位於今年都係病星位。對馬會而言，十分不利，所以由邊個入口入都無關痛癢。
奇門財位要記住！
師傅同時提供了初四及初五的財位位置，方便大家之後兩日賭錢時用。
買馬仔入馬場定喺屋企賭，其實分別不大，只要同樣買馬時跟足財位企就冇問題。打電話落馬纜記住行啱位呀！
鼠年全年財位於正東
其實不論喜歡賭錢與否，大家都想今年全年有財到手。總括今年鼠年而言，一間屋的財位於正東方。想有正財或偏財都好，以屋企為中心找出東位方向，將東位位置執拾好，保持整齊亁淨，仲要夠光猛。想加強財運，可以放一些有水流動的擺設，或養一缸金魚，金魚數目為6條或8條。喜歡植物的，可以於東位擺放一盆大綠葉植物，如黃金葛等，但一係唔種，一種就要種得夠綠夠茂盛，否則反而會影響財運。
賭錢3大忌切要戒！
賭仔特別信邪，輸緊錢的，會做好多小動作希望趕走衰運，有幾多真有幾多假冇人知，只抱住「寧可信其有，不可信其無。」的心態，試吓都要。其次，賭錢時的禁忌傳聞多的是，又有幾多真？昇龍師傅唔算得完全了解，但按照古老傳說，都能分析其可信程度的一二，還講出賭錢3大禁忌。請留意！
忌遮額頭
有傳前額有靈光，不少老人家都唔贊成劉海遮額頭，賭仔更話遮住額頭難贏錢咁話。師傅就絕對贊成：「賭錢時，梗係夾起啲頭髮好。額頭係人的開揚位，雖然冇話同生財有直接關係，但遮住就一定冇運行。」
忌「un」腳
很多男生都有個壞習慣，就係「un」腳。問到師傅賭錢時的小動作禁忌，佢想了一陣就十分肯定咁話：「千祈唔好『un』腳，會退財。人搖就福薄，人都坐唔穩，有財都俾你搖走啦。賭錢時一定要坐得舒舒服服，穩如盤石，財運就會更易來。」
忌心煩氣躁
馬迷輸錢發脾氣而掉飛、打牌無糊食而鬧牌，大家都見過不少。不少賭錢為題材的電影，都有提到心煩氣躁會輸錢。師傅都話：「呢個當然係！個人亂就自然冇錢贏，要心平氣和，喜悅才可帶財來。」
