一向對中國傳統沒有認識的鄭融，只知道新年要洗邋遢，其餘的習俗她都不太理解。不過自從去年朋友送了一本流年運程書給她後，鄭融會特別留意有甚麼地方要注意。未知曾與陳冠希傳緋聞的她，會否特別留意桃花運呢？
肖鼠的鄭融於去年的運程麻麻，特別是身體經常出現小毛病，她說：「本來我都唔信流年運程㗎，不過舊年有個朋友送咗本運程書畀我，入面話屬鼠嘅朋友要特別注意皮膚出現問題，都咪話唔信邪呀，我身邊幾個肖鼠嘅朋友同埋我，舊年真係皮膚唔好，我就成日出粒粒。」
少說話多做事
經過去年的運程書指引，鄭融已查閱過今年的運程，她開心地表示：「啲書話我今年運程唔錯，而且身邊會有好多吉星貴人出現幫助我，加上話我事業少障礙，但係就叫我小心說話。」
一向心直口快的鄭融都知自己說話技巧一般，有時言語上得罪了別人都不知道，所以她會緊記運程書的指引，於新一年少說話多做事，她說：「其實同我熟嘅人就知我講嘢冇乜尾音，我唔係冇禮貌，嚟緊我會改善呢個習慣，說話時小心啲啦。」
每年鄭融都會逛花市，而且一定會買一個風車，希望新年行大運，她說：「我好鍾意行花市，嗰度啲氣氛真係好熱鬧，我最想花市可以賣啤酒，我唔係鼓吹大家飲酒，只不過外國好多market都會有酒賣，喜慶節日飲少少酒，人都開心啲。」
不鼓勵賣倉鼠
然而鄭融最不想於花市見到有人賣倉鼠仔，她說：「我好驚啲人因為今年係鼠年就擺檔賣啲倉鼠仔，小動物唔係過時過節嘅禮物，好多人會因為個節日而買一隻小動物做禮物送畀人，我勸大家千祈唔好咁做。」
採訪：李珮洳
攝影：陳偉權
服裝：A.T
髮型：KateShekofhippihairculture
化妝：VinCTsang
場地提供：FatAngelo's（CausewayBay）
