憑無綫劇集《野蠻奶奶大戰戈師奶》飾演狐狸精而人氣急升的新紮姐仔楊秀惠，原來是位鼠女。今年踏入24歲的她出生於馬來西亞，所以對中國人傳統所指的本命年犯太歲烏啄啄，反而注重過節氣氛及美食。
過年楊秀惠會回大馬老家，跟家人團圓度春節，日前她在中環接受記者訪問時便笑說：「我係屬鼠，米奇老鼠囉，我本身冇宗教信仰，唔識得犯太歲呢啲嘢，但如果爹哋媽咪話要攝太歲，我都會去，其實我覺得順其自然最好，最緊要開心。」
大馬的農曆新年與香港大同小異，楊秀惠透露一家人會打邊爐共享賀年美食，並說：「我哋喺新年會買銀柳做年花，媽咪畀嘅利是就放枕頭底，其他嘅會儲起，我會注重氣氛多啲囉。」
採訪：朱倬誼
攝影：陳慧安
化妝、髮型：ErikHui@BeautyTech
服裝：Killah 協力：黎敏茵
場地：富豪香港酒店富豪金殿