鄺美雲（Cally）噚日同佢舅父舅母，仲有佢隻愛犬Cash，一齊去咗竹園探訪一班公公婆婆。Cally一到埗就第一時間派利是畀班老人家，之後佢嘅舅父舅母獻唱粵曲，阿Cash就做壓軸嘉賓表演請請，向一班公公婆婆恭喜發財，之後仲嚟個倒立行路，𠱁得班老人家不知幾開心。
盼淫照事件平息
Cally原來探訪呢班公公婆婆超過20年，其中一個104歲嘅婆婆一見到佢就好開心，不停捉住佢傾偈，Cally話：「佢叫阿愛嘛，每年我最少嚟一次，同佢哋都好熟，每次嚟都諗，今年又見面，好開心。」Cally話阿Cash最叻𠱁老人家，今年佢搵咗阿Cash同舅父舅母表演，自己就淨係現吓身，佢話因為舅父舅母唱粵曲好好聽，所以費事獻醜咁話。
講到最近嘅淫照事件，Cally話：「希望新一年，大家都有慈悲嘅心，存好心，唔好再講唔好再睇，令個世界和諧啲，唔好再喺人哋嘅傷口上灑鹽。」