傳統上年初三赤口不宜拜年，不過一家人喺屋企翻食隔夜盆菜、你眼望我眼剝瓜子，感覺蘇波榮（soboring）！冇年拜又唔想喺屋企亁曬，最好落街睇騷，開眼界少交嗌。今個新年，港九新界各大商場輪流showhand，專揀文藝活動節目，提升品味兼情操，包無話大年初三相嗌唔好口。口是心非，偏偏又好渴望赤口玩應節，咁就不如鬧雙胞獅子/撕紙開赤口。
記者：劉嘉蕙
攝影：陳陶鈞
瘦身獅子 醒獅大縮水
生肖，一年轉一個，舊年一街豬、今天一地鼠，喺動物界，能夠年年人氣保持no.1只得一個──百獸之王獅子！一到新年，扭開電視都要整part舞獅贈贈興，唔覺唔覺睇咗咁多年，原來醒獅悄悄縮水。
「50年代醒獅一般有12呎長，獅頭平均重量達20公斤，去到2000年，通常只得8呎長，體重更減磅至2.5公斤。」醒獅展策展人陳嘉輝師傅說。
迷你靈活挑戰高難度
「以前舞獅技巧比較簡單，較多機會喺平地表演，少跳躍動作，所以整長啲都冇問題。」陳師傅補充。50、60年代，一隻獅頭賣成8千元，所以特別講究獅頭要耐用、穩陣，材料主要有木頭同竹，再加上多層紗紙及紗布黏合而成，閒閒哋用上幾十年。
新科技講user-friendly，色彩由黑黑沉沉轉為金金銀銀，在體積上，mini版醒獅更切合年代需要，「近年舞獅表演多了高難度動作，體積較細，活動比較靈活。」陳師傅指，2000年後醒獅物料主要是鋁及藤枝，紮作亦冇咁仔細，由獅頭望出去會仲透光！現時一個獅頭約價3千元，一般用一個新年就玩謝。
醒獅進化論
50-70年代 劉關張霸天下
據說舞獅源於三國時代，早期醒獅以黃、紅、黑為主，寓意三國演義的劉關張。
80-90年代 Sharp醒顏色
告別黑沉色調，80年代醒獅開始採用較鮮艷色彩，長度亦縮至10呎，以應日增節目。
2000-今日 Cutie百變
為配合舞獅賽事要求，新一代舞獅體積輕巧、外形較cutie，部份獅被更選用閃閃珠片，使其造型更奪目。
世界樹王及百年樹鼓展覽
日期：即日至2月15日
地點：屯門市廣場中央廣場
查詢：24507782
無師撕紙 5分鐘速成
63歲的敏叔李昇敏撕紙如食飯，訪問當日，敏叔本來食緊叉燒飯，一見到記者及攝記，即時熱情表演撕紙絕技，由我個名及攝記剪影，一一被敏叔撕勻，毋須打稿，5分鐘內速成。
以撕紙聞名的敏叔堪稱本土藝術家，題材及物料信手拈來，快餐店紙又撕得、雜誌紙又撕得，奧運、生肖、甚至英文字，都難逃他手指罅。一身撕紙絕活渾然天成，「83年我去外母家拜年，食飽飯無事做，無意中見到花盆上『大吉』兩個字，剛好對稱，於是隨手抓些紅紙，臨摹撕出第一幅作品。第二次撕紙已經是6年後，我在深水埗執到張『黃金萬両』揮春，返屋企又試吓撕，朋友見到好鍾意，於是越撕越多，後來連圖案對稱都唔使，乜都可以撕。」
外賓前獻技
敏叔將自己的撕紙藝術取名為「思毅」，寓意做人要不停地思考及堅持創作的毅力。他自言長年收入不穩，妻女早已離他而去，現時要靠綜援為生，因為對撕紙一番熱誠，讓他找到寄託，他曾兩度獲禮賓府邀請，在羅馬尼亞及拉脫維亞總統前獻技，連日本傳媒都來訪問。今趟商場展覽，是敏叔第一個個人作品展。
a.這幅字圖材料為快餐店餐紙。
b.敏叔愛對聯，對完再撕，佳節送禮自用均宜。
c.撕紙內容緊貼時事，這兩款為08奧運系列。
d.生肖系列之雞，維肖維妙。
e.難度之作「舞」，模仿9個舞者翩翩起舞。
f.難度之作「舞」，模仿9個舞者翩翩起舞。
李昇敏個人作品展
日期：即日至2月24日
地點：新元朗中心
查詢：24792208
備註：2月9及10日（3:00pm-5:00pm）極速撕藝表演工作坊