淫照風波震撼娛樂圈，不少藝人昨日均議論紛紛。
滕麗名 戥女星慘
「唔係啩，又話拉咗，好驚呀，呢個時候如果俾人移花接木就好慘，𠵱家警方查緊，唔方便回應。」
楊秀惠 模仿奇拿
「希望件事快啲過去，唔好踏入鼠年有唔好嘅消息，發相嗰個人係睇咗《死亡筆記》，學奇拿挑戰人？我戥啲當事人慘，無論啲相真定假，咁樣發放真係唔好。」
江若琳 藝人困擾
「真係希望件事快啲完，我都有睇過Edison公開道歉嘅新聞，放相嘅人唔好再去傷害啲女藝人，咁會令到啲女藝人好受困擾。」
胡楓 時有發生
「我冇睇啲相，作為長者同長輩我唔評論呢件事，其實以前又好，𠵱家又好，一樣有呢啲嘢㗎。」
戴夢夢 怒斥人渣
全港人都應該支持所有牽涉嘅女星走過呢個難關。發放嘅人有挑戰警方嘅成份，相信好快會拉到人，要佢得到法律制裁，呢啲行為好人渣。」
馬國明 唔好再影
「我冇睇過啲相，啲女仔好慘，希望大家唔好再睇，希望件事快啲過去，影相嘅人都有問題，唔應該影，就算鍾意都唔應該影，放相嘅人係挑釁警方，不過電腦上嘅嘢好難捉，喺唔同地方每度發啲出嚟都好難捉啦。希望啲女藝人勇敢面對，唔好再影呢啲嘢。」
