今日是大年初一，BMA一眾歌手日前在鍾鎮濤帶領下到元朗花圃舞獅，祈求全公司同事在鼠年事事如意。他們更計劃新年到老闆家開賭局，大發新年財。
鍾鎮濤（阿B）早前帶領關心妍、車婉婉、文彼得、樂隊V和謝文雅等年輕歌手，到元朗一個花圃挑選賀年花卉，他們更舞獅打鼓。
B哥哥透露新年要到美加登台，所以未能與兩個囡囡和女友范姜度過，但就打算到美國與兒子會合吃開年飯，他說：「做藝人新年有得搵錢梗係要做啦，呢啲騷有酬勞之餘仲有利是收，收入都唔錯㗎。」原來B哥哥以往過年都會寫揮春，他說：「我好鍾意寫揮春送畀朋友，好意頭呀，朋友收到又開心，不過未知今年有冇時間寫。」
婉婉宴請好友
身為酒家老闆的車婉婉忙做電台工作之餘，晚上又要返酒家招呼客人，她說：「新年見到所有人一家人食團年飯好開心㗎，我每年都會同啲夥計食團年飯，因為大家都為咗舖頭辛苦咗成年，大家一齊開開心心食餐好嘅。」婉婉已相約大班圈中好友到家中大吃大喝發新年財，她說：「可能自細阿媽都好鍾意招呼朋友返屋企食嘢，我就繼續佢好客呢個傳統，所以今年會叫好多朋友上我屋企食嘢同賭錢。」
年年登台搵錢
關心妍則會到澳門登台度新歲，她謂收入相當不俗，她說：「𠵱家澳門咁多賭場，做騷嘅酬勞都唔錯㗎，最重要係收入同去美加登台差唔多，但就唔使坐長途機咁辛苦，所以我希望年年新年都有機會去澳門做騷。」
組合V和謝文雅則計劃相約師兄師姐到老闆家中𢭃利是，他們說：「我記得舊年上老闆屋企，佢派大利是畀我哋，之後就叫我哋拆利是賭錢，佢自己就拎住大叠金牛做莊，最後佢就做大贏家。」
採訪：李珮洳
攝影：陳志嵐
場地提供：財利花圃農場
獅頭提供：陸智夫
髮型：BillyChoi、RitzLamofHairCulture、MoofChin.G、MingLai、AbbyofHair
化妝：Keman
服裝：JillStuart、Derrest&ing