江若琳舊年喺多個音樂頒獎禮上，總共得到八個新人獎，佢對有咁嘅成績好滿意，而佢嘅一班忠實fans特別喺銅鑼灣CEO設祝捷會，當會上司儀宣讀佢得過嘅獎項時，江若琳仲感動到喊咗出嚟，而且越喊越凄凉。
再同Fans搞BBQ
江若琳對fans話：「去年初有啲不快事發生喺自己身上，擔心fans會離開我，有啲新聞令我好驚，對自己失去信心，唔知點去面對，好在有fans支持教曉我唔使驚。」講完之後佢即90度向fans鞠躬以示謝意。
本來江若琳今次準備請170名fans，但因為場地所限只能安排65人，所以佢會再搞BBQ希望可以齊集全部fans，佢話：「過年會放假四日，其間會去睇中醫調理身體，媽咪送咗一部跑步機畀我，因為今年會唱快歌跳舞，要練好啲氣。」