恭喜恭喜，今日大年初一，八方恭祝各位讀者新年進步，身體健康，鼠年發大財。內地大風雪漸息，香港娛圈卻刮起淫照龍捲風，好多市民日望夜望「源頭」快啲出新相。據八方同各界友好非正式統計，由於噚晚好多人留喺屋企上網等睇新相，所以各區花市似乎無往年咁迫人，反而網絡就大塞車，好多父母懵盛盛，老懷安慰以為仔女忽然黐家陪佢哋過年咁乖，白白封咗封大利是畀仔女。
呢場喺互聯網掀起嘅淫照風暴席捲全城，象徵香港已經正式進入Web2.0年代，喺呢個虛擬與現實crossover嘅新世界，網民越來越有say，戊子鼠年佢哋拜年唔再講恭喜發財、萬事勝意呢啲老土四字詞語，而係「我哋係咪朋友？」「係咪fd先？」網民無分國界，上網即係朋友，朋友即係可以傳相啦，多謝晒！
喺offline嘅世界，新年大派利是最受歡迎，全民online嘅年代，派利是不如send隻「貓」（email）嚟啦。利是要由長輩派，送「貓」卻無分大細，呢幾日拜年時，八方肯定有人問「有冇新相？」朋友可以傳相，何況親戚？八方提醒大家，招財貓老少咸宜，淫賤貓卻兒童不宜，送貓前三思。
呢個新年係友誼大考驗，平日稱兄道弟者忽然形同陌路唔送「貓」畀你，咁你應該反省吓，第日帶眼識人。有高官同八方慨嘆官場無真心，平日笑騎騎搭晒膊頭嘅人，到咗呢啲關鍵時刻卻忽然扮唔熟，只係舉手指之勞傳個email都托手踭。
教授求淫相做教材
資訊科技界立法會議員單仲偕為網民出頭，好多「朋友」以為佢有好多料，追問佢有冇相，佢卻向八方對燈發誓，強調自己真係冇收到任何疑似女星淫照，「平時我個email收到好多無厘頭鹹濕相，今次卻一張都冇，好出奇。」
八方聽聞有新聞系教授都跪求淫相，佢堅稱唔係自用，只係作傳媒道德、網絡媒體同互聯網法例課程教材（唔包括攝影科），其實佢唔使緊張，八方相信佢啲學生一定有相，喺全民皆網年代，學無前後，有相為師。