恭喜發財！祝大家鼠年行運一條龍，日日鴻運當頭事事順境，學生哥讀書考試科科掂，打工仔升職加薪兼分紅，老細生意興隆唔憂做，股市狂升牛市長旺人人賺個盤滿缽滿。大年初一唔知去邊好？玄學家方海閱師傅就教大家向東而行，西貢同柴灣都得，仲講埋其餘吉星分佈方位，等大家揀啱時辰吸盡財氣同桃花！
記者：梁美甜
攝影：楊錦文
模特兒：Tiffany、Penny（TheGroup）
鳴謝：方海閱師傅
正東財星現 食嘢逛街可吸財
據玄學家方師傅指出，鼠年當運財星八白喺正東位，所以想行個大運吸財氣就要直踩東面喇！九龍區東位係西貢，而港島區就係柴灣，想大年初一吸財氣好簡單，只要直踩呢啲東面地區散吓步、耍吓太極、逛吓街食個飯都已經吸到財。
但要記住喺吉時出發，即係朝早7至11點又或者下晝5至7點、晚黑9至11點之間，千祈唔好係凶時即係中午1至3點鐘出發喎！吸財就要喺吉時由屋企直踩西貢散吓步再食個海鮮餐，再來一個甜品更係Perfect！無論係情侶或一家大細溫馨一下都唔錯，玩番日又可吸吓財氣，一舉兩得，何樂而不為呢？
東北文昌星 食齋名利雙收
四綠文昌星飛臨東北方，據說文昌星掌管功名利祿，想學業或者事業成績標青嘅不妨趁年初一吉時跑轉東北方嘅大嶼山喇！年初一去得大嶼山就梗係乘機同親戚朋友坐吓昂坪纜車喇，唔想同人迫咪去佛門清靜地寶蓮寺食個齋菜，清心又清腸胃，仲非常應節㖭！
中央桃花星 姻緣貴人齊有
今年一白桃花位喺中央位，正係中環同尖沙嘴，所以想姻緣旺人緣好，上司朋友客戶關係好，拍拖機會多到慢慢揀嘅話，就要喺吉時走轉中央地區，催旺桃花嘞！一家大細平時少去尖沙嘴，初一不妨喺吉時出發，齊齊行轉星光大道兼欣賞維港景色，唔怕迫仲可以睇埋花車巡遊㖭，一年一次國際級節目，單拖嘅唔知會唔會桃花旺到即時可以眾裏尋他/她呢？
西南偏財星 不勞而獲最盞
今年七赤偏財星飛臨西南方，之不過叫得偏財，唔係話付出幾多就得番幾多，轉個角度亦都可以話唔使做就有財喇。想得偏財運不妨趁吉時跑轉西南嘅赤柱或石澳，作為假日活動嘅亦可以拖手仔或者拖男帶女齊齊來個石澳郊遊，吸吸新鮮空氣又可以欣賞一下石澳出名嘅花崗岩，同小朋友上自然堂促進親子關係又可以催財運，賺晒！
■潮流興Eco-tour，大家何妨去一趟石澳郊遊兼吸偏財氣，唔知幾時中六合彩呢？
小秘技
初一忌諱 化解有法
新年唔多唔少梗有啲忌諱，初一就避免食肉尤其係牛肉而要茹素。
今年五黃災瘟星同流年三煞位喺正南方，而病符星就喺西北方，師傅話齋，千祈唔好喺南位坐或卧，想化解嘅可以放個發聲嘅銅鐘、6個銅錢咁。而三碧是非星就喺正西方，化解就可以放番3個紅色物品，好似利是封、揮春、紅花咁。
小秘技
遊船河吸水 犯太歲唔怕俾人篤
鼠年有四個生肖犯太歲，分別係鼠、馬、兔、羊。除咗求取所謂太歲符化解之外，簡單啲可以喺晚上吉時遊船河，正所謂水能催旺姻緣旺桃花，而旺桃花即旺貴人，幫補唔少㗎！遊船河唔一定坐遊艇，平平哋幾蚊坐天星小輪都得㗎！方師傅仲建議犯太歲嘅全年都多啲遊吓船河，可能遇多啲貴人㗎！
十二生肖行運小秘訣
每年每個生肖都有唔同運程，正所謂有「趨吉避凶」之法，想新一年行運一條龍，就要留意方師傅傳授嘅小秘訣喇！
鼠
今年犯「伏吟」太歲，代表今年頗動盪，有可能會轉工、搬屋、搬公司等情況出現。好彩有「金匱」「將星」等權星高照，工作表現都有人欣賞，財運亦不俗。
旺位：東北 旺色：金、銀
旺飾：宜戴肖龍、猴、牛飾物
牛
今年同「六合」太歲相合，加上有「太陽」「天乙貴人」等吉星照，工作事業上仍然有貴人扶持指引，但慎防鋒芒太露，招人妒忌就唔好喇！
旺位：西北 旺色：橙、紫、紅
旺飾：宜戴肖雞、蛇飾物
虎
今年「驛馬」星動，即係走動頻繁嘅一年，而且係要邊做邊學兼辛苦得財嘅一年。若從事紀律行業或者會有升職加薪機會。
旺位：西南 旺色：黑、灰、藍
旺飾：宜戴肖豬、狗飾物
兔
今年工作事業得「太陰」星相助，即多女性貴人扶助，事業財運都有不俗表現，雖然係辛苦之年，但算係多勞多得嘅一年。
旺位：東南 旺色：黑、灰、藍
旺飾：宜戴肖豬、狗飾物
龍
今年與「三合」太歲合，加上有「華蓋」星照，即藝術創意得到發揮，打工仔就有升職機會、東主則能提升社會地位。財運亨通兼投資得利一年。
旺位：東北 旺色：橙、紫、紅
旺飾：宜戴肖雞、猴飾物
蛇
今年較去年平穩，但仍須為工作奔波，有「月德」「祿神」貴人星幫助，人事及工作上有難題都可以迎刃而解。
旺位：西北 旺色：綠、青
旺飾：宜戴肖雞、猴、牛飾物
馬
今年與太歲相冲，亦稱「反吟」「歲破」，將要面對變動，有機會搬屋、搬公司、移居、轉工或人事變化等。今年亦係「大耗」之年，需要損耗大財。
旺位：西南 旺色：綠、青
旺飾：宜戴肖虎、狗飾物
羊
今年與太歲相害，屬犯太歲一種，但影響不大，加上有「龍德」「紫微」兩粒強勁權貴星照，貴人扶持下必逢凶化吉；「玉堂」星照令才華發揮，事業更上一層樓。
旺位：東南 旺色：橙、紫、紅
旺飾：宜戴肖豬、兔飾物
猴
今年有「文昌」星照，求學或從事文職者皆有好成績，而且歲逢三合，則人緣運好，尤其係從事與客戶打交道嘅肖猴者。
旺位：東北 旺色：啡、泥黃、金、金黃、銀
旺飾：宜戴肖蛇、龍飾物
雞
今年運程強勁，有多顆吉星拱照，工作事業發展暢順，財源廣進，如魚得水，投資亦有可觀回報。但要注意見好即收，以保持可觀利潤回報。
狗
今年有「天解」星照，代表逢凶化吉，即使遇到困難，最後都可以解決。不過亦有「浮沉」「天狗」等凶星為惡，令事情容易橫生枝節，要避免做危險運動以防身體受傷。
旺位：西南 旺色：橙、紫、紅
旺飾：宜戴肖虎飾物
豬
今年無大吉星照，但比去年穩定，若去年有辦喜事，今年運程更順暢，否則有較多波折。受「陌越」星影響，有環境變遷或人事變動，適應較吃力，要多忍耐。
旺位：東南 旺色：金、銀
旺飾：宜戴肖虎飾物
資料提供：方海閱師傅（香港淳道玄學總會會長）
查詢： http://www.fonghoiyue.com.hk