奧運煙花：奧運年爆北京<br>$0消費煙花靚位

奧運煙花：奧運年爆北京
$0消費煙花靚位

𠵱家一年中有煙花睇嘅日子都唔少，國慶放、除夕又放，不過只有農曆年初二的煙花最好睇，皆因呢個時候，屋企人都放晒假，可以團團圓圓一齊睇餐飽。今日年初二的煙花主題是「京港同心迎奧運」，加入咗08年全世界都關注的北京奧運元素，有幾幕煙花會見到同今年奧運有關的特色效果，一定唔可以錯過。今日我哋就搜括維港兩岸的睇煙花靚位，最緊要只係$0消費，包你同屋企人有個Perfect嘅煙花夜。

記者：洪偉順
攝影：陳盛臣、陳陶鈞
Model：Michael、Kiko、Shanna、Eriko、Miho@Stagemodels
服裝提供：滿清皇朝（27814998）

今年的賀歲煙花加大碼，煙花數目由上年的2萬幾發加到4萬發，而煙火躉船就加多１隻，由3隻變4隻，營造出長1,000300米高的煙花屏幕效果，耗資700萬元，點都要去捧吓場！

必睇4幕

第2幕：龍馬精神
配樂：花開富貴

呢幕煙花顏色用上螢光色，觀眾透過高清電視可以睇到好有立體感、層次分明的花團錦簇。

第5幕：奧運北京
配樂：奧運北京

今年係北京奧運年，第5幕煙花首次出現「北京」兩個中文字，下面更有「2008」數字，奧運主題盛放眼前，而最底部的「橙色燭光」則代表奧運聖火開始燃燒。

第6幕：蓄勢待發
配樂：WeAreReady

望上去好似好多個啦啦球，代表迎接奧運的到來。呢幕採用各式環狀煙花，最頂最大是「錦冠煙花」，再到「花閃爍」，底部再加上一個「彩芯帶皇冠」，似足雙球雪糕筒。

第7幕：馬到功成
配樂：WilliamTellOverture

香港有份搞馬術比賽，頂部金黃色「馬尾」煙花十足馬匹尾部搖擺的動作，感覺萬馬奔騰。

其他推介

第１幕：財神到
配樂：財神到

放出大元寶形狀煙花做主打，寓意迎財神新年發大財。

第3幕：恭喜發財
配樂：恭喜發財

300米高空放出「8、8、8」，數字周邊仲有金色光環。

第４幕：春回大地
配樂：春回大地

高空散出4色彩色閃爍，就好像花朵般慢慢飄落大地。

第8幕：舞動全城
配樂：舞動全城

樹狀的煙花樹枝急速向四周伸展，表現香港活力非凡。

第９幕：好日子
配樂：好日子

彩色子母彈空中爆開，形成好像瀑布、雨點的煙花。

第10幕：歌唱祖國
配樂：歌唱祖國

半空的「紅色五角星」表達香港人好愛國，場面壯觀。

三大商場靚位逐個捉

想要搵個睇煙花靚位，當然係去維港兩岸！如果去熱門的餐廳或者酒店用餐，為咗短短約半小時就玩完的賀歲煙花，要提早訂位又要付出昂貴價錢，肉都赤埋，而且今日先去訂位分分鐘唔使諗。不如揀人流旺、又唔迫，而且食飯交通又方便嘅三大商場睇煙花仲好！

西九新場$0　溜住冰睇煙花

去年10月開幕的圓方商場，是今年睇煙花的至Hit新場，足足有3個靚位，兩個在戶內，一個在戶外，位置更對正煙花躉船，Fit到爆！今年比起往年都要冷，一家大細要出街睇，但對住啲刮面嘅冷風，真係頂唔順。所以圓方商場內地下溜冰場的玻璃窗位及1樓向海的玻璃窗位就啱晒，唔使俾風吹，視野清晰！如果想有現場煙花的爆炸聲，就要行出去溜冰場外面的行人路。

■地下溜冰場側邊的玻璃窗位，唔使食風又可以睇煙花。

■入咗溜冰場，都可以一邊溜冰一邊睇煙花。

■1樓向海兩側玻璃窗可以睇到煙花，夠闊落。

圓方（27355606）

地址：尖沙嘴柯士甸道西1號

海港城$20　老牌煙花地

海港城停車場頂層天台今晚照例會用來作煙花觀賞地，因為天台位置對出就係中環海景，而且煙花躉船同睇嘅位置好近，簡直可以用「近在咫尺」去形容。所以睇嘅時候人人都要昂高頭，煙花爆開一刻，企嘅位置都會震埋一份，連煙花啲火藥味都可以聞到。不過海港城呢個靚位今日就唔係任你入，必須憑票入場！任何人只要在海港城消費滿$800，就可以加$20換兩張入場票，記得早啲攞定飛入場，唔係俾人霸晒靚位就無癮啦！

■海港城停車場頂層，最接近煙花躉船，放嘅時候地下會震。

■今晚海港城停車場一架車都無得留低，最多可容納一萬人睇煙花。

■旗桿位置就是海港城停車場，煙花就在不遠處海面發放。

海港城（21188666）

地址：尖沙嘴廣東道3-27號

港島IFC$0　雙層煙花位

香港島其實都有好多最佳位置，例如中環港外線碼頭，都可以一覽無遺咁睇煙花。不過天寒地凍企半粒鐘頂唔順，其實都可以捐入IFC逛一陣暖暖身，今年對住4隻煙花躉船位就只有國金一期的商場，記住唔好搞錯走咗去二期！而國金一期呢個靚位其實喺戶外平台，所以各位一定要着定禦寒衣服。此平台同海邊的距離不遠不近，看煙花的確不錯，可以看到煙花在頭頂爆開那刻的震撼感，爽！如果你走出3樓同4樓的平台就搵到免費筍位，不過4樓有多間餐廳酒吧，地方略為淺窄，要早啲到霸定頭位！