恭喜發財！鼠年伊始，周星馳親率《長江7號》眾演員，包括童星組的徐嬌和黃蕾、身形圓咕碌的林子聰和姚文雪、騎呢派的李尚正和馮勉恆，連帶外星狗「7仔」，擺出八星報喜陣勢，藉今日大年初一向讀者拜年。
周星馳在賀歲片《長江7號》中，繼續帶挈眾演員上位，包括其10歲契女徐嬌、9歲的黃蕾、肥仔林子聰和肥妹姚文雪、飾演曹主任的李尚正、專着橡筋頭高腰褲的馮勉恆，就連為救星爺而壯烈犧牲的外星狗7仔，也備受小朋友喜愛。今次星爺就帶着回魂的7仔以及6位演員向讀者拜年，祝大家鼠年happy樂無憂。
「徐嬌唔好咁叻」
對着調皮的徐嬌和黃蕾，星爺笑不攏嘴，尤其攬着她們合照時，徐嬌在他身後扮超人打怪獸，黃蕾則在他面前伸脷瞪眼，他也任她們搓圓㩒扁。接着眾演員大鑼大鼓影賀年照時，徐嬌坐在肥仔聰肩頭，未料鬼馬星爺說：「不如我坐另一邊。」他一屁股坐到肥仔聰另一邊肩膊，搞到他眼鏡下滑，熱到滿面通紅。舞獅尾的李尚正擺出拗腰O形腳高難度動作，星爺見他一身造型已忍俊不禁，更着他「表情再誇啲」。
提到鼠年願望，星爺希望《長》片大收，他說：「新年睇呢套戲係好好嘅親子活動，希望成績更加好，同埋豬年尾發生好多唔開心嘅事，內地又有天災，希望隨住豬年過去，人人生活安定。」
星爺農曆新年會到內地宣傳電影，徐嬌也會隨他東奔西跑，星爺向徐嬌笑道：「你下年唔好咁叻啦，你歌又唱得好，戲又演得好，再咁搞落去，你做埋我嗰份，我冇得撈啦，畀條路嚟行吓啦，否則我只能做導演。」徐嬌則向星爺謂新年想收大利是，星爺說：「大利是會畀，但你最緊要讀好書。」
渴望人人變胖
黃蕾揚言很喜歡農曆新年，每年都會跟家人逛街買新衫。姚文雪也說：「希望各位跟我一樣胖，因為如果大家都胖，那就覺得我不胖了。」李尚正則無厘頭說：「我希望儲錢結婚，我有好多女朋友，呢年要揀定一個，然後集資上市做大企業，咁嚟緊就會發達。」肥仔聰就說：「若然今年自己搞電影，希望請到星爺客串。」
採訪：朱倬誼 攝影：林德雄
協力：葉君海、黎敏茵
場地：HarbourPlazaHotel
髮型：PaulHui@XenterJut
化妝：Margaret、Venue
中國服提供：上海灘 外星狗電腦特技：Menfond
新春guide：新歲完全娛樂手冊
新正頭除了四圍拜年𢭃利是外，其實還可以一家大細看看電影、欣賞演唱會、圍在家煲碟睇電視，以下就為大家精挑細選各種娛樂節目：
電影
《魔街理髮師》（SweeneyTodd）現正上映
《長江7號》現正上映
《魔法奇緣》（Enchanted）今日上映
《潛水鐘與蝴蝶》（TheDivingBellandtheButterfly）今日上映
《L之終章．最後的23天》後日上映
演唱會
ThePolice演唱會
日期：今晚7:30
地點：澳門威尼斯人綜合館
陳慧嫻慈善演唱會
日期：明日、後日
地點：九展StarHall
你的克勤演奏廳
日期：明日至本月14日、18日
地點：香港體育館
票價：$480、$300、$200、$100
郭富城舞林正傳演唱會延續篇2008
日期：本月14-17日、21-23日
地點：亞洲國際博覽館
票價：$480、$300、$150
電視
本月11日：《97家有囍事》翡翠台1:45am
今日：賀歲盃足球賽：港聯對烏拉圭彭拿路翡翠台2:45pm
明日：京港同心賀歲煙花滙演翡翠台7:55pm
後日：《功夫》有線電影1台1:40pm
DVD
《投名狀》DVD$149
周杰倫《2007世界巡迴演唱會DVD》$159
《破事兒》DVD$99
陳奕迅《Movingonstage1KaraokeLive3DVD》$199
資料來源：《蘋果》資料室
