你同我都有個永遠養唔大嘅仔──紅簿仔，點解人哋撈到風生水起，我就霉到一潭死水？師傅話齋，一命二運三風水，我間屋唔夠四正，財神咪入唔到屋囉！趁踏入鼠年，跟實陳子才師傅擺個鼠年催財風水局，單靠一杯水喉水，幾支開運竹，所費無幾就有機會過肥年，係咪好抵先？
記者：盧家蕙
攝影：林栢鈞
Wardrobe：LouisVuitton（陳子才）
陳子才，師承蘇民峰，為近年備受注目之風水命理及玄學心靈專家，經常接受各大傳媒、電視節目訪問及為報章雜誌撰寫專欄，著作包括《二零零六年狗年運程》及《二零零七年豬年運程》。
莊思敏：擺植物即有Job
擁有42吋長腿的新紮女模莊思敏，出身富裕家庭，家住山頂豪宅，雖然含住金鎖匙出世，她卻偏偏要幹一番事業：「今年多咗出騷，拍廣告及硬照都多咗。」篤信玄學命理的她，多番邀請陳子才師傅前來擺風水陣：「裝修前師傅已經嚟睇過呢間屋，新一年佢教我點擺先有利事業同增強財運，我覺得好work，工作量及收入都即刻多咗唔少！例如我跟足佢教擺放水種植物、轉用灰色地毯、插多啲開運竹咁，方法好簡單又生活化，但就好有效。」她邊聽師傅教路，邊拜託小記寫清楚啲，因為怕自己聽漏要點，希望到時睇住份報紙跟住擺風水局喎！
擺牛搵貴人
吉位：東北
東北方向擺放牛形擺設，與鼠相剋，有利增強人氣，有貴人相助，財運自然會好啲。
師傅貼士
1.牛形擺設基本上甚麼都得，甚至print張牛牛寫真都得。
2.如東北方位撞正係細路仔睡房，咪叫小朋友畫張牛牛圖貼足成年囉﹗
綠色助升職考試
文昌位：東北
文昌位屬木，想升職加薪考試無難度，可於東北位擺放圓形花樽，插上4支開運竹，此舉尤其適合創作行業。
師傅貼士
1.唔夠位擺開運竹，改用綠色物件都得，如綠色地毯或座枱燈。
2.如果東北面係書枱位，咁隨意擺綠色file或綠色水樽都得。
3.綠色物件係越大越好，但師傅一再強調：「要合理地大！大到霸晒你成張書枱又點努力工作呢？」
催財放水
財位：正東（即日出方向）
所謂「水為財」，財係要慢慢聚出來，只需於正東放一杯水喉水就得。水喉水唔使日日更換，待蒸發後加番水就得。
師傅貼士
1.容器越大就越好，放大大個金魚缸自然更work。
2.切忌用瓶口太細的容器，事關財富好難積聚，如啤酒樽等就不太適宜。
3.滾動式流水擺設亦不太好，由於屬電動式，電力屬火，不利水；滾動式亦象徵金錢「easycome,easygo」，難以聚財。
石春搵伴侶
喜慶位：東南
有錢冇碇使，想搵個伴陪你風花雪月？今年東南屬喜慶位，只要放8粒石春，單身人士有望搵到另一半，有對象就可望結婚，有配偶則可望生小孩。
師傅貼士
1.於東南位放8粒白色石春，收旺丁旺財之效。
2.如果是窗台位，可放4小盆泥種植物，大小要一致，並排而放。
3.不宜揀仙人掌等有刺植物，開花植物容易凋謝，應盡量避免。
音樂盒抗病大病位：正南，小病位：西北
百病纏身，財神又點埋身？08年想健健康康，唔想病痛接踵而來，只需放金屬或可發聲物件便可洩氣，咁包你通多幾晚頂都唔會咁易病！
師傅貼士
1.大病位在正南，尤其影響男性；小病位在西北，影響女性。
2.擋煞首選手動式音樂盒，切忌用電動式，因電屬土，會加旺病位。
3.鋪上灰色地毯，毯底黐上女皇頭或洋紫荊的5毫子硬幣6個。
4.避免使用金色風鈴，易招麻煩。
5.忌見紅色物件，揮春可改用金色，既喜慶又可洩病氣。
6.若西北位剛巧用上紅色座墊，甚或是紅色梳化，唔想換過新嘅，可用金、銀、灰、白、黑色布作遮蓋就搞掂。
粉紅色擋小人
是非小人位：正西（即日落方向）
小人屬木，擺放屬火的粉紅色物件就可洩其氣。最好於正西插上9支（9字亦屬火）粉紅玫瑰花，踢走小人。
師傅貼士
1.用泥種的粉紅色花，效果更佳。
2.對鮮花敏感者，可改用假的粉紅色花。
3.如沒有位置擺放鮮花，可使用粉紅色地毯。
4.在辦公室正西方，放1隻粉紅Kitty公仔，甚至貼1張粉紅卡紙於地上，咁就無人知係風水陣。
其他注意事項：植物看門口
原來全屋所有門口，包括睡房、廁所、廚房等一切門口，只擺放水種植物已可增強運勢。另外，尖葉形的品種亦不宜擺放屋內，如仙人掌屬大忌。
