舊年丁亥年年初一（二○○七年二月十八日），本欄引述八卦邱之話，講慎防做豬，又講到○七年未必有○六年咁好景。現在回顧番，當時預測，有對有錯，○七年其實係興旺過○六年，但係丁亥年下半年嘅股市大幅度波動，有人喺上半年賺嘅錢，一個唔小心就輸番出去，特別係去年年初一講：「本來土生金，利金融銀行業，但己土唔算強，生金之力不大，麻麻地啦。」呢，丁亥年十二月（即今年一月），銀行股大跌，滙豐與內地銀行股股價跌到股民面青，足證丁亥年立春日（己巳日）之己土確係生金之力不足，金融股威威吓就腳都軟晒，全世界金融股莫不如此。
今年又如何？立春日仍然係二月四日，時維十九時○一分，當係戌時（如果要拗，係癸酉時與甲戌時之交），一般以為立春日之八字為戊子年甲寅月甲戌日甲戌時，四陽木三陽土一陰水，缺金缺火，但戌藏辛金丁火，算係可補不足。
八卦邱話凡正月甲木，要有丙火照曬，癸水濟木，丙癸皆透，正晒，癸藏丙透，名寒木向陽，大富大貴咁話。睇番立春八字，丙藏於寅，癸藏於子，藏而不透，力度有所不足，差少少，但唔算曳。
既然如此，鼠年之鼠乃係木鼠，靈活度不夠土鼠之機靈，鼠之活力唔多夠。既然立春八字多木，甲木不弱，而甲木生火，唔怪得好多人都話今年股市利屬火之股票，如電訊與電子、石油等。金融又點呢？木多而缺金，反映金在鼠年不能剋木，正反映木旺金囚，金不能舒展，銀行股仍然麻麻，大概次按危機後遺症甚多，經濟不景導致信用卡貸款有提高撥備之可能性，令金融股疲弱。此外，木旺土死，地產咪唔掂？目前香港進入負利率時期，有利炒樓，而上述之木氣不是太強，因此地產唔會唔掂嘅，大家炒樓不要太狼便是。
以上各點，當作茶餘飯後之談，不可太認真。綜合○八年經濟前景嚟睇，美國全年滯脹之局已成，十分難搞，股市一定唔會扯順風旗，美國地產正式係木旺土死，難以復甦，既然如此，香港經濟唔靠得美國，唯有向北望，希望北水打救。