踏入新嘅一年，先同大家拜年，祝大家今年橫財、正財、偏財全部就手，身體健康！
好多人話投資贏輸事小，千祈咪輸信心，但係俊樺就認為最重要都係健康，呢排個市大家都睇到、感受到，真係好波動，挾高插低嘅幅度好得人驚，就算兜咗幾個圈唔使輸錢，其間心情波動對健康嘅影響，可能已經係得不償失。
就好似前晚花旗股市咁，無端端又跌成400點，話佢無端端唔係講個跌勢，而係幅度，事前又有邊個估佢跌咁多？跟住昨日港股會點，大家都會心裏有數，結果恒指埋單唔見1339點，250日線又再次失守，半日成交有706億，長假期前呢個成交絕對唔係細，睇番幅圖，昨日出現「十字星」，即係話喺呢個水平好淡雙方嘅戰鬥力都好強，算係拉成均勢。呢兩日港股放假，花旗嗰邊由昨晚到明晚都有市，下禮拜一港股點走，要睇佢哋，尤其係明晚嘅花旗股市，會直接影響港股復市嘅開盤表現，當然，從外圍嘅市況嚟睇，淡友佔有優勢，不過，跌市都會有機會，就係如果港股再跌，應該喺乜嘢位買乜嘢貨，呢個禮拜日得閒可以諗吓佢。
正股250日線有支持
長實C輪9712：長實（001）昨收119.10元，最低115.10元，喺250日線有承接彈番上嚟，博反彈可以諗吓隻C輪9712，隻輪昨收11.7仙，有效槓桿率4.4倍，正股升上130元，9712應該喺16.8仙附近，正股跌穿114元止蝕。