豬年行完花市，鼠年都有地方去，八方介紹個應景節目畀大家。裝修完無幾耐嘅中大文物館，噚日起展出十幾件同老鼠有關嘅文物，包括陶瓷同水墨畫。文物館館長林業強同八方講，大家唔好以為老鼠一定係過街老鼠、坑渠老鼠，會帶嚟鼠疫，一見到老鼠就行衰運，其實見到老鼠可能係好兆頭，此話何解？
林館長話，老鼠十分為食，所以有老鼠嘅地方一定有嘢食，以前窮人屋企米都冇多粒，唔好話有老鼠啦，所以老鼠多數喺闊佬豪門大宅先出現，因此老鼠亦可以話係富貴象徵。聽完林館長解釋，八方明晒，原來老鼠同律政高官一樣，都係歧視窮人，對有錢人另眼相看。呢個展覽至3月30日止，文物館平日朝十晚五開放，公眾假期除外。查詢可致電：26097416。