年三十點解要行花市？老套講句：「祈求一轉行大運。」所以連一班有線的驕陽新星，包括《愛鬥大》的Zoie、跟谷德昭主持《味力昭人》的Kelena和Mable、彈得唱得的戴澴雨、《線動真音樂》主持鍾健威Ray，以及演過《喝彩》舞台劇的陳健豪，日前無懼風雨都要到維園花市掃年貨。我哋將6人分為兩組作賽，以最少錢買到最多年貨為之贏！走勻全場原來佢哋嘅心水貨色竟然一味鬥大，所以最後掃咗唔少吹氣類玩嘢產品返屋企。
記者︰陳國輝、陸俊雄、陳諾堯、朱崇德
攝影︰林栢鈞、梁細權
服裝︰Zoie、Ray@K2
Hair︰Ming@04NO8
遊戲規則︰
6位驕陽新星分成兩組，每隊3人行手執300個大洋，於一炷香時間內，找5間甘願被宰割的攤檔，以最少籌碼買到最多特色年宵貨品為之贏。
攞你命2008：唔搞鬼嘅唔揀！
隔籬Team兩男一女就玩砌字遊戲，自行組隊叫「嬲爆」；至於另一邊廂就改咗個綽號叫「攞你命2008」，意思係新年玩乜都會贏咁解喎！未正式吹雞前，最多計仔嘅阿Ray就度咗條天衣無縫嘅戰略：「嗱！勝出關鍵係Product要有特色啫，我哋揀啲貨夠靚又有話題性，評判一定Buy！」夾喺兩人中間嘅Kelena就話：「不過啲錢要慳住用先得㗎！」Mable：「我口才最叻，不如等我同班檔主劈番個靚價啦！」好，出發！
Round1
鼠年風車轉唔停手
曾經喺澳洲留學，現職為有線娛樂台《味力昭人》及《線動真音樂》節目主持嘅Mable，咪睇佢鬼妹仔性格，原來好鍾意中國傳統小玩意㗎！衝入年宵市場唔夠1分鐘，佢即刻走入一間賣鼠年風車嘅檔攤，仲聯同Kelena二人齊齊揀最大最靚嘅風車，祈求今年轉番個好運咁話！當Mable開口叫價「易發」（$28）嘅時候，年老嘅檔主即展露微笑，然後話：「怕咗你兩個靚女，$48賣畀你喇！」原來除咗有鼠年公仔之外，仲有豬仔、老虎同馬騮仔㖭，花咗約3分鐘，佢哋終於揀咗個巨型鼠年風車，應節吖嘛！
Round2
Condom墊祝出入平安
咪以為得兩個女仔有貢獻，阿Ray行行吓亦成支箭咁標去另一間檔攤！佢以「騎呢」為宗旨，所以乍見呢個巨型Condom，起初仲以為呢檔賣性愛用品，睇真啲原來係吹氣坐墊！據檔主講，呢款產品有4隻味（顏色）：包括榴槤、辣椒、香蕉同薄荷，當你吹脹圓形外環嗰時，就變成一個坐墊；而當吹脹外面嗰層，即變身為咕𠱸。不過兩位女仔見到呢件產品似乎有少少尷尬，最後由阿Ray獨力成功講價，比市價平$30成交！
Round3
溏心鮑魚攬實唔放
現場有年宵攤檔玩到超激的鮑魚，唔通真係玩過界？有線節目《味力昭人》嘅主持人Kelena立即走上去查個明白，原來檔主話，當知道無綫即將開拍嘅《溏心風暴》第二集之後，身為電視迷嘅佢靈機一觸就諗到要設計鮑魚咕𠱸，仲有大細唔同Size㖭，勁有創意！
Round4
小白鼠奶糖嗒得落
因為質量問題而登上港聞版嘅傳統糖果－「小白兔奶糖」，亦被複製成「小白鼠奶糖」咕𠱸，喺年宵攤檔出售！佢最抵死係由白兔變白鼠，Mable睇見即刻攬到實，唔捨得走，仲想拆開裏面睇吓有冇得食「小白鼠奶糖」㖭！阿Ray知道時間無多，即刻走上前同檔主劈價，成功以$48買到兩隻！
Round5
偷食炸可樂唔抹嘴
到最終回合，由於3位喺講價時已經口水亁晒，結果選擇性以炸可樂及維他奶作為最後一件年宵亁貨。乜食物都算咩？評判梗係唔肯過佢，呢一回合，佢哋唔單止冇向檔主講價（可能太肚餓關係），仲一鋪食清光，冇帶番終點位置。結果係點？大家估吓啦！
其餘攤檔一樣精采
爛Gag街道賀新年
嫌揮春老土咩？不如考慮喺屋企貼張爛Gag街道名，如「贏到開巷」、「香港始終有里」等，夠晒入流。另外，仲有iPhone、MSN嘅白板，任你點寫都得，夠晒創作空間。
派米黨攬得兼穿得
檔內亮起一盞紅燈，起初仲以為裏面賣雞蛋同賣米！睇真啲，呢袋米其實係一個咕𠱸，攬住佢認真舒服。另外仲出售寫上「有米」嘅T-Shirt，祝你發大達咁話！
巨型杯麵當凳仔
離遠已經見到好似半個人咁高嘅出入平安杯麵，一睇就知唔食得。但檔主話由於設計上出現問題，個蓋打唔開，頂多只能夠當凳仔畀小朋友坐，或者擺喺屋企做裝飾。
賽後總結：「嬲爆隊」大件夾抵食，SureWin！
經兩位《蘋果》特派評判商議之後，決定「嬲爆隊」成為呢個遊戲嘅勝利者，恭喜晒！雖然，賽後「攞你命2008」打算上訴到終審法院，企圖推翻原賽果，但一切已成定局，冇得上訴！理由係：「嬲爆隊」買返嚟嘅亁貨夠大件，就算唔玩得都睇得，而且總數加埋只係$180，較之「攞你命2008」嘅$242，慳咗接近$60！最重要一點係，成員之一嘅Kelena將所有炸可樂食清光，嚴重違反遊戲規則，所以判定「嬲爆隊」成為Winner！
許先生：「今日我預咗花$100掃貨，行晒咁多檔，心水之選梗係賣三國演義啤牌嗰間啦，當紅明星個個玩移花接木變武將，幾咁型！」
潘先生：「我已經帶定$200，諗住亁貨濕貨都會買。其中一間出售垃圾桶形狀嘅毛公仔攤檔最有創意，夠靚之餘仲好實用㖭！」
