香港協辦奧運馬術比賽，奧運聖火亦會經香港送上北京，傳送聖火係神聖任務，港協暨奧委會特別成立小組挑選傳遞聖火人選，小組成員包括馬會主席陳祖澤、藝發局主席馬逢國及體育界名宿韋基舜。
每人舉火炬跑30米
香港共有120人獲選接力傳遞聖火，八方收到風，火炬手名單已初步擬定，當中包括科大校長朱經武。據了解朱經武近日接獲中央有關方面通知，指佢喺火炬手名單榜上有名。奧運聖火香港傳遞路線途經奧運馬術賽場地沙田體院、尖沙嘴鐘樓等具象徵性地點，最後一站係金紫荊廣場。
120個火炬手會喺5月2號出動，每人其實只係舉起火炬跑30米左右就完成任務，朱經武平日有做運動習慣，據聞幾乎日日都行山，跑30米對佢嚟講真係完全冇難度。朱經武得悉入選後心情興奮，好榮幸咁話。
八方問中國香港奧林匹克委員會會長霍震霆點解揀朱校長做火炬手，佢話暫時不便透露，只係話「乜你消息咁靈通！」至於其他火炬手名單，佢表示仍未可以正式公佈，有待北京奧組委審批先可以公開。