今晚食完團年飯，凍到連年宵都唔想行，但再凍總有一件事要做，就係上頭炷香！相傳年初一乃天門大開之時，上頭炷香就係為咗第一個向神明請願，神明對上頭炷香者最有印象，自然最眷顧此人。特別係豬年股市上上落落弄得市民心情七上八下，踏入鼠年玄學師區仲德教路，求財記緊着紅底入黃大仙對正西方上香；肖馬者則無懼「馬馬虎虎」起行。
記者：馮冠芝
攝影：陳盛臣
模特兒：JoJo&Zeuswater@IG綜藝社群
鳴謝：滿清皇朝
黃大仙似華佗人人都幫
天寒地凍煙霧熏眼，上頭炷香唔算好玩事，之但係點解個個爭崩頭都要上頭炷香呢？區師傅話上頭炷香就係為了搶運，「一年之始，一眾神明會出現助善眾，而神明對第一個上香稟神的人自然最有印象，亦最願意幫一大早上香那班人。」所謂神明最先受理的頭炷香時辰，就係年三十晚11點至年初一凌晨1點。而地點當然係眾所周知的黃大仙廟！區師傅解釋，因為黃大仙係得道仙人，對錢財不着重，不理你係有錢或窮人，只要你誠心就受理，「黃大仙就好似華佗咁，用心幫人，可以話百搭，你求財運、事業、愛情、健康都得。」
一馬不宜當先 與虎同行化解
雖然話越早上香越好，但今年犯太歲的五個生肖：馬、雞、羊、鼠、兔就要特別留意，特別屬馬者與今晚11時（子時）相冲，最好過了凌晨1時後才上香，不用一馬當先！肖鼠肖馬可謂水火相冲，不宜結伴上香，但若能與肖虎朋友同路則可化解。區師傅再提提大家，最緊要計埋自己寒命（生於冬天）還是燥命（生於夏天），寒命者宜穿暖色衫如紅、紫；燥命者則穿土色衫如黃、啡等。着啱顏色上頭炷香，自然旺上加旺！
123GetReady！
着好靚衫搵啱朋友，當然要記得準備上頭炷香必備祭品，依足規矩才更顯誠意！
3.大香3支上主壇用。大細定義，在於上主壇的香，不可比上其他壇的細。
上香Do&Don't
求財向西着紅底
香港地人人想發達，豬年股市忽上忽落，想喺鼠年翻身，區師傅教路：年三十晚上頭炷香欲求旺財運，最緊要向正西財神位拜（方位天天轉，上述為今晚子時方位），再着條紅底褲，唔係邪住邪住，而係旺上加旺，「今年土水年缺火，穿紅色自然當旺，更易招喚太歲幫忙。」另外求財者以沉香上頭炷香就更好，「沉香物罕而貴，以難得之香求珍貴之財，最能討神明心。」若有其他所求者，該拜何方位，用甚麼香祭，師傅再醒你以下簡表。
香唔使大 家要靠近
區師傅話跟唔跟足全部上香步驟要睇緣份，「完成晒自然最好，但若然做到五成已好好！」現代人對電腦多過上一輩，學上香儀式時不禁衍生頭炷香之謎，好，就等區師傅解開呢個謎！
Q1：上頭炷香係咪越大支越好？
A1：其實上香最緊要誠心，太大支香神明都未必有足夠時間享用晒。只要有誠意，細支唔緊要，反而時間就要早少少。不過香的大小，都有暗示你誠意大小之意。
Q2：如果今晚去唔切黃大仙，在屋企上頭炷香有用嗎？
A2：若不能往黃大仙，在家最好向住黃大仙廟的方位上香以示尊敬！不過黃大仙助人，自然越在鄰近越易受助。
旺上加旺催旺物
上頭炷香都係為咗加強個人運氣，區師傅就建議大家上香時添佩紅色為主的飾物，理由跟紅底一樣，在土水缺火一年，以紅色催旺。而今年屬馬、雞、羊、鼠、兔者犯太歲，記得要掛個太歲牌，燒埋道太歲符化解！最後，上完香更可去行年宵買不同的花，放在不同方位，咁鼠年必能大吉大利。
配飾
花
求學業事業 首選上環文武廟
區師傅話黃大仙求甚麼也受理，不過若大家特別想求事業，或子女讀書不理想，就可以去文武廟轉轉運。
文武廟供奉文昌帝及關帝，兩位傳奇人物得道成仙後主理人間文事武功，即現在所講的事業學業，所以有此求的朋友上文武廟就啱晒！而香港、九龍、新界都有文廟武，區師傅就建議大家去上環文武廟，因為人氣較旺。再提提大家入廟前記住敲響廟前大鼓，告知文武二帝你到此拜祭，通傳一聲，文武二帝幫都幫你先。幫細路求學業當然更要帶備芹菜及葱，取其勤力聰明之意，小朋友學業自然進步。
轉運更可求人緣 必到車公廟
車公廟唔係初三先去咩？上頭炷香關車公廟咩事？
車公廟供奉的是宋朝的車大元帥，當年村落發生瘟疫，村民相信已逝的車元帥法力高強，便供奉他以求解困，結果瘟疫消失。所以往車公廟拜祭有轉運意思。不過區師傅話，車公廟亦會助求姻緣之人，「特別係感情不好、人事爭執多的人，最適宜去車公廟上頭炷香。」至於上香祭品，與拜祭黃大仙差不多，唯一不同係上香記住轉埋四葉銅風車，再買個風車回家。
