《富爸爸窮爸爸》呢本書，相信好多朋友都睇過，估唔到公司一位新同事嘅爸爸，親身演繹咗富爸爸呢個角色。Uncle嘅理財技巧了得，敏妮當然唔會放過學嘢機會。
據同事講，佢爸爸一早已經將公積金投資喺大陸基金，又一早已經喺西環買樓。呢兩瓣投資，唔使敏妮多講，就知已經有豐厚收成，至於點解Uncle可以早着先機，正係敏妮想知嘅原因。
公積金盡投中國基金
原來Uncle係工程師，經常中港兩邊走，所以好早期已經感受到大陸經濟起飛，內地股市有景，佢一直有留意大陸嘅投資機會，但係覺得大陸股市始終係一個封閉嘅市場，加上又唔係咁熟悉大陸股嘅炒賣方法，所以就將部份公積金嘅投資轉去投資大陸基金。直至前幾年，佢確認大陸前景良好，所以進一步將所有公積金轉投大陸基金。
睇好西環遲早有地鐵
另外，Uncle由於工作關係，好留意香港政府嘅地政規劃，同樣喺好早期，佢已經感覺政府擴大鐵路網絡，雖然Uncle住喺新界區，但深信如果政府要完善鐵路網，西環遲早有地鐵，加上佢工程師嘅眼光，所以十幾年前就喺西環嘉輝花園買咗個單位。
家住西環嘅光頭仔話，十幾年前嘅嘉輝花園只不過係幾十萬銀，由於港島地鐵西線其中一個站就喺正嘉輝花園隔籬，家陣嘉輝花園樓價已經升到170萬至180萬銀，而且嗰個盤喺區內回報率算高，因為size細、租金收入吸引。
Uncle令敏妮學到，投資唔係好高深嘅學問，只要留意身邊嘅事，就可以搵到投資靈感，最重要係信自己，有耐性。
網誌： http://wanmanil.com/blogs/